St. Raymond of Penyafort, Siangbawi

(1175-1275)

Audio (aw) zong in ngai khawh a si. 👇👇

Dominican bu i pathumnak Bishop a simi St. Raymond cu 1175 kum, Spain ram, Penya khua mi phunsang chungkhar in a rak chuak. A thluak a ṭhat tuk caah kum (20) a si lio tein Bercelona khua ah khuaruat thiamnak subject kha a rak cawnpiak hna. Kum (30) a si ah Bupi upadi-Canan Law cu tazaamah upadi hna in thiamsang Dr. degree laak dingah Balotima khua ah a rak kal. Mi sifak hna cungah a ngeih mi lungthin peknak, pek siannak le zawnruahnak, dawtnak, zohchunh awktlak a si bantukin Basilona Bishop bawmtu Deacon sinak kha 1219 kum ah an rak pek. Kumthum a rauh hnu ah Dominican bu ah a lut i Judah miphun lungthlennak caah a rak i zuam thawk. Muslim kuttang i thongtla hna kha tangka pek in tlanhnak caah, “Luatnak Bawinu Bu” kha St. Petani Lesco he i bawm in an rak dirh. Cu lio caan ahcun St. Raymond cu Canan upadi ukpi uk (5) kha a rak ṭial rih. Mi sifak hna nih an rak hal mi kha sual dantatnak caah inpiak dingin Pope kha a rak hal.

1238 kum ah Dominican bu i uktu pathumnak ah an rak thim. A bu hna sinah a ke in a va leng tawn hna. Thlarau lei a tuurun hna kha zulhphung ningin umnak, ca lei duhnak le lamkaltu nunnak hna kha duh thiamnak lungthin a khumhpiak hna. A caan hmanungbik hna kha zumhnak a palh mi hna dohnak, Spain ram i Muslim hna an lung an rak i thlen ṭhannak hnga tuahnak hna in a hman. St. Raymond cu kum (100) a tlinnak, 1275 kum ah a thi.