Epiphany of the Lord
Audio (aw) zong in ngai khawh a si. 👇👇
Epiphany timi cu Greek holh in ‘Langhter’ timi sullam a ngei. Mifim pathum puai timi Epiphany puai kha hlunghlai ngai in kan tuahnak thawngin mifim pathum hmang in minung vialte aiawhtu, Bawipa Jesuh nih a langhter nak kha a kan cinken ter. Mifim pathum tiah mi tampi nih theih mi mifim hna cu Jesuh Khrih biak awkah nichuah lei in Jerusalem khua ah a rak ra. “Atu ah hrin mi Judah Siangpahrang cu khuazei ah dah a um? Arfi kha nichuah lei ram ah kan rak hmuh caah amah biak le hmuh dingah kan rak ra” tiah an hal hna. Cu bia cu Herod Siangpahrang nih a theih tikah a thin a phang i Tlangbawi ngan hna le Bible thiam hna kha a pumh hna hnu ah “Bawipa Jesuh hi khuazei ah dah a chuak hnga, tiah a hal hna. Cu hna nih cun Profet pakhat nih a ṭialmi ningin cun, “Maw (Jerusalem) Judah ram, ka mi Isarel uktu Bawi cu nanih chungin a chuak te lai” tiah Herod cu an ti. Cu tikah Herod nihcun mifim pathum hna kha Bethlehem khua ah a thlah hna i, ‘Va kal ulaw ngakchia cu va kawl u, nan hmuh ahcun rak ka chimṭhan te u, kei zong nih ka va biak ve lai’ tiah a cah hna. Cu mifim hna cu an chuakṭhan i arfi an hmuhṭhan caah an i lawm ngaingai. Arfi cu an hmai in a kal i ngakchia umnak zawn a phak tikah a dir. Inn chung an vun luh tikah Nu Mary le naute kha an hmuh cangka, an bawk i an biak hnu ah Sui, Hlawban le Mura an timi mansung thilri hna in an biak. Herod Siangpahrang sin kir ti lo dingin zan mang ah langhnak an hmuh caah lam dang in an ram leiah an kirṭhan.
Mifim pathum hna nih an va biak lai nak kong kha Profet Isaiah nih Isaiah 60:6 chungah, “Kalauk bu nganngan cu Midian le Efah in an ra lai. Sheba in an ra lai i Sui le Zihmui kha an rak phorh hna lai. Pathian nih a tuah mi thil kong thawngṭha kha mi nih lunglawm tein an thangṭhat te lai” tiah a rak chimchung cang. Bible hlun Profet chimchung bangin cu mifim pathum hna cu mifim pathum an si tiah sulluam a phuan. (Ps 72:10-11). Cun (Number 24:25) chung zongah arfi kong kha Balaam nih a thanh ve nak kan hmuh. Hlan lio tuanbia ningin mifim pathum hna an min cu (1) Gaspa, (2) Melkou le (3) Beltasa an si tiah kan theih. An rak i put mi laksawng hna zong sullam pakhat cio an ngei dih ve. (1) Sui cu Jesuh Khrih Siangpahrang a sinak kha a langhter. (2) Thlacamnak sullam a ngeimi Hlawban cu Jesuh Pathian a sinak kha a si. (3) Mithi hna thuh mi Mura cu Jesuh cu mi vialte khawh awkah a thi te lai timi kha a langhter.