Bishop Lucius i Kumthar Biacah
Kumthar bia cahnak;
Ka dawtmi Pathian fa le hna atu lio caan ah harnak tampi um hmanh sehlaw kumthar kan phanh khawh hna caah i lawm cio ko hna u sih.
Nihin kan phanhmi Kumthar cu, Mary Pathain i Nu puai zong a si i, vawleipi Dainak Ni (World Day of Peace) zong a si. Vawlei Daihnak cu raltuknak um lonak le meithal thawng a kin men lawng si loin, pakhat le pakhat i cohlan thiamnak, i bawmhnak, le kan si khawh tawk in i hramhnak tu kha a si. Pope Leo XIV zong nih daihnak caah aho poah i tel khawh a sinak kong a chim ve. “(Smiling face) Hmaipanh tein midang na chawnhbiak hna zong kha daihnak tuahtu (peace maker) pakhat na si ve” a ti.
Cu ruangah, daihnak timi cu cabuai cungah le meetingpi hna ah sign thut le remhdaihnak va ser lawngah a si-a tling kan ti kho lo. Nihin kan relmi gospel (Luke 2:16-21) chungah Mary a khuaruahharnak: “Tuukhal pawl nih ngakchia cu an hmuh tikah amah kong vancungmi nih a chimmi kha an chimh hna tikah,” Mary cu bia tampi chim loin thil sining vialte hna kha a lung chungin a ruat lengmang hna tiin kan hmuh.
Mary nih remdaihnak timi cu zeibantuk dirhmun le sining dah a si ti kha a kan fianter: bia ngaihnak in siseh, ruahnak in le tlaihchannak in a kan siter khawh. Mary cu thil sining dihlak a thei kho lo nain, Pathian Fapa kha a nunnak chungah a cohlan khawh. Mary kha “Pathian i Nu” a tinak thawngin Bupi zong nih vawlei kan tuanbia chungah Pathian aa tel ve timi a langh ter. Cucu kan temhinnak, hnahnawhnak hna le tlamtlin lonak phun kipin a khatmi, a dam lomi kan vawleipi ah Pathian nih a kan umpi ko tinak a si.
Vawlei cungah daihnak Siangpahrang nih Mary paw chungin hmun a rak lak a si ahcun, nihin caan zongah kanmah hna nih Mary nih a ngeihmi lungthin kan ngeih ve lawngah daihnak Siangpahrang cu kan co khawh ve hna lai.
Jesuh nih daihnak a kan pek (Jn 20:19) tiah Baibal nih a kan cawnpiak bantukin Jesuh a min cu, “Pathian nih a khamh” ti a si. A min hrimhrim ah biakamnak a tling. Kan Myanmar rammi hna le kan nunnak nih a herh takmi daihnak cu Biatak (Jn 14:6) a si i, Cu Biatak a simi nih, “Pakhat le pakhat karlak remdaihnak a tuahtu cu mi thluachuah an si,” (Mat. 5:9) tiah a cawnpiakmi kha kan cung cio ah tling hram ko seh.
Pope Paul VI nih Janualry thla nikhat ni cu “Vawleipi Daihnak Ni” tiin Thlarau fimnak in a rak thanh. Kumthar kum zong mipi hna caah Pathian sin a pekchanhnak zong a si. Biatak daihnak cu dinfelnak, pakhat le pakhat i upatnak, misifak hna he nun i hrawmnak le i theihthiamnak ah kan hmuh khawh (James 2:18).
Kum hramthawh in kan `uanvo: (Mat. 5:9, Romans 12:18)
Kumthar kan phanh in kan theih awk a simi cu ‘kannih cu Pathian daihnak a cotu lawng kan si lo. Kannih cu daihnak a phurtu kan si timi hi a si.
· Kan innchungkhar ah Lungsaunak le i ngaihthiamnak in
· Kan Bu chungah dawtnak le miphun kip he i cohlaan thiamnak in
· Kan pawngkam ah herhbaunak a um tik caan poah ah dingfel tein le biatak tein `uanvo lak khawhnak in kan nun awk a si.
Kan tuukhal `ha a simi Bawipa Jesuh bantukin, lawmhnak le dawtnak he kan umnak kipah a thawng`ha bia phuang hna u sih, kalpi cio hna u sih!
Kumthar ni ah, kannih pakhat cio zongnih a ra laimi caan vialte kha ‘Daihnak Siangpahrang Nu’ sinah pekchanh hna u sih. (Num 6:24-26) Kan Bawipa Mithmai `ha cu kan cung cioah tlang seh law, kan thinlung, kan chungkhar kan vawleipi ah Daihnak laksawng kan pe hram ko seh!
Amen!
Msgr. Lucius