Venezuela nih a tonmi thil kongah Pope nih a lungretheihnak a langhter

Hramhram ral sernak le nunzia ṭhalo kha hrial awk le tei khawh in Ram Nawlngeihnak kha kilven awk a chim. Venezuela mipi caah ṭhatnak a chuahpitu upadi uknak dirpi asi khawhnak hnga, rammi hna i an covo upat ding in Pope Leo XIV nih Angelus thlacamnak ah sawmnak a tuah. Venezuela ah naite thil cangmi kongah a lungretheihnak a langhter. Zarhteni ah khan Venezuela ram, Caracas khualipi ah President Nicolás Maduro le a nupi Cilia cu American ralkap nih an tlaih hna i New York ah biaceih dingin an kalpi hna.

“Dawtmi Venezuela mipi ṭhatnak nih a dang ruahnak vialte kha a tei hna awk a si. Hramhram ralsernak kha tei khawhnak le dinnak le daihnak lam zulh awkah a kan hruai awk a si. Ram nawlngeihnak kilven awk le, phunghrampi ah aa telmi upadi uknak fehter awk ah, rammi covo upat dingah le lungdaihnak, hmailei caan saupi tiang a nguhmi daihnak sersiam awkah hmunkhat ah rianṭuanṭi awkah a kan hruai awk a si. Remdaihnak caah hnatlaknak ngeih awk le (concord), chawleh chawhrawlnak ah harnak dirhmun ruangah sifahharnak hna kha a hleiin ṭuanchuah kilven awk asi,” tiah Pope nih zanlei Angelus thlacamnak ah a chim.

Pope Leo nih Mithiang Peter Biakinnpi tual i a rak phanmi mi vialte kha, Venezuela mipi caah thlacam dingin a sawm hna, amah pumpak hrimrim zong nih thla ka campiak ve hna lai tiah mipi sinah a chimh hna.Cun Venezuela mi vialte kha Coromoto khua i Bawinu Mary, Venezuela zohkhenhtu, Mithiang José Gregorio Hernández le Mithiang Carmen Rendiles thlacampiaknak tang ah a pekchanh. Angelus thlacamnak cu daihnak Pathian i bochan dingin sawmnak in a donghter. “Daihnak Pathian kha zum peng ko u si” tiah a forhfialnak a tuah. “Ral ruangah harnak a tongmi miphun hna he lungrual tein thlacam hna u si tiah a chim chap.