Mary Mother of God

A thiangmi ngaknuthiang Mary kha Pathian Nu a si tiah a hlan tein an raku pat mi a si. Kumzabu 4 chungah Constantinople Bishop a simi Nestorus nih Nu Mary cu Pathian nu a si lo, Jesuh nu lawng a si tiah fakpi in a chi mi Greek holh ‘Theotokos’ kha a rak al. Asinain Nu Mary cu Pathian a si ve mi Jesuh nu a si ruangah ‘Pathian Nu’ nan ti lai tiah AD 43 kum, Efesa khua ah an rak tuah mi meeting nih fiang tein a fehter i a rak thanh. Meeting a dih hnu ah mi vialte cu Bishop hna kha conglawmh in khua chungah an vak i lunglawm tein teinak puai an rak tuah. Cun meeting pi teinak philhlonak caah Pope Sixtus II nih rumra a ngeimi St. Mary Biakinnpi kha Rome khua ah a rak sak.

Cu ni bak ahcun Jesuh Khrih cuarpar tannak puai le Jesuh min peknak puai kha komh in an rak tuah. Jesuh timi min cu ‘Khamtu Pathian’ timi sullam a ngei. A ruang cu, cu ngakchia niriat tlin, cuarpar tannak ni a phak tikah Jesuh tiin min an sak tiah (Lk 2:21) chungah a ṭial caah a si. Hi kong hi (Gen 17:21) chungah ‘Nangmah na tefa hna nih, atu in hin cun fapa nan ngeihmi poahpoah cu niriat an si ah an cuarpar nan tan dih hna lai’ tiah zungzal Pathian nih Abraham sinah a chimmi bia nawl ngaihnak kha a si. Cuarpar tannak timi cu Pathian sinah pekchanhnak tiah sullam a ngei.