Epiphany Puai
BAWIPA LANGHTERNAK (KUM A)
Isaiah 60:1-6; Eph 3:2-3,5-6; Matthai 2:1-12
Ca reltu dawtmi nulepa ulenau hna, Nihin ah puai nganpi kan tuah i kan Khrihfabu calendar nih Epiphany tiah a auh. Hlan ahcun, hi puai cu Siangpahrang Pathum Puai tiah an auh i an puaini cu January ni 6 tuah a si tawn. Greek holh in Epiphany timi cu “langhternak” tinak a si. Jesuh Khrih hrimhrim nih mi vialte sinah aa langhnak le Jesuh Khrih thawngin mi vialte sinah Pathian aa langhnak a si. Hi puai hi holyday silo caah mipi nih hlawknak an hmuh khawhnak hnga le cu lio caante ah cun Christmas sullam kong pehzulh tein ruahnak an ngeih khawhnak hnga, Zarhpini ah thlen a si. A ngaingai ti ahcun, kan phunglam ahcun, hi puai hi Christmas caan hmanungbik ni a si nain cheukhat caah cun, Christmas ni hmanungbik cu Bawipa tipil innak puaini kha a si. Christmas ni hmanungbik a siah siseh, a siloah siseh, laksawng a hmu rih lomi hna caah, tu hi kan caan hmanungbik a si.
Nihin kan thawngṭha relnak ah, Pathian nih vancung ah ahleice ceumi le aa dangmi arfi pakhat a hman i, nichuahlei in Jerusalem tiang mifim hna kha a hnuh hna. An inn le thilri himnak kha an kaltak i arfi kha an zulh nain caan tawite chung a tlau caah lam cungah harnak an tong. An ruahchannak pakhat lawng a ummi cu hi a harmi kawlnak a donghnak ah, vawlei ceunak a simi Arfi Jesuh Khrih hrimhrim kha an hmuh lai ti hi a si.
Biafang pakhat fianternak phunglam ningin, laksawng pathum kong a um caah Bethlehem ah mifim pathum nih Bawipa an hmuh tiah kan ti. Asinain, palhnak in Herod siangpahrang inn ah an lut i a donghnak ahcun Bethlehem ah Pathian nih a thlahmi ceunak kha an zulhnak thawngin Khrih sinah lam an hmuh.
Caan tampi ah Khrih sin a kan hruaitu ceunak cu kan ngakchiat lio tein Jesuh he a kan hngalhtertu dawtnak a ngeimi kan nulepa hna thawngin a ceu tawn. Keimah caah cun, vailamtah hmelchunhnak tuahning a ka cawnpiaktu ka nu le ka pa hmangin Thumkomh Pathian he kan i tong. Midang nih cun Cathiang an hngalhnak, Khrihfabu an dawtnak le an ziazalei ralṭhatnak hna in thazaang a petu saya bantuk arfi an ngei. Hi a ceumi hna nih hin ceunak Siangpahrang, Jesuh hrimhrim sinah an kan hruai.
Dawtmi unau hna, Pathian sinah sui, zihmui le mura kha kan put lo. Cu nakin, kan lungthin, kan ruahnak, kan thlarau le kan pum kha Amah sinah kan ratpi. Sui, zihmui le mura cu khualtlawng mifim hna nih nunnak Bawipa sinah an put khawhmi thilri hlawnthil ṭhabik an si. Asinain an i zuamnak, an nunnak an peknak, himnak le hnangamnak kaltak an duhnak cu an ziaza le an fimnak taktak a langhtertu laksawng a si.
Kan pawngkam ummi hna i ceunak nih lam a kan hruai caah, kanmah hrimhrim zong midang caah ceunak kan si awk a si. Nunnak man kan fehter tikah, minung sinak man kan thanh tikah le ahmaan le ahmaan lo kha dik tein kan thleidan tikah Pathian sinah kan lungthin kan pek. Lungsaunak, thuknak le fek tein dawtnak kan ngeih tikah Pathian sinah kan thinlung kan pek. Pathian sinah kan thlarau kan pek tikah fakpiin thla kan cam, zaangfahnak he kan cawlcangh, dinfelnak kan dirpi, caan tha le chiat caan ah kan i lawmh. Midang pum kan upat tikah, fahnak hma kan ṭem tikah, rawl a ṭammi rawl kan pek hna tikah, taklawng mi hnipuan kan thuamh hna tikah, inn ngeilo, lo ngeilo hna dornak kan pek hna i midang caah kan nunnak kan pek tikah Pathian sinah kan pum kan pek.
Dawtmi ca reltu ulenau hna, Epiphany timi cu mi sinah Khrih kan langhter a hau, kanmah nih zohchunh awk ṭha in thawngṭha chim a hau i ralchanhmi pawngkam hmanh ah Khrihfa nunphung kan nunpi a hau tinak a si.