ZATLANG NUN KHUASAK A ṬUMCHUKNAK LE ZATLANG PHU AA CHEUMALNAK
Minung thawhkehnak hna cu a nung i lunglawm thanuam tein a um dingmi minung nawlngeihnak tinvo kha an ngei i minung huham a ngeimi, vawlei cung i a nung i a ummi thilnung saram an si. Cucaah kokek pawngkam rawhralnak, tulio hmanmi minung a ṭhangcho a karhchomi sinak caah rian a ṭuan liomi hna pungsan le thilri hna sawksamnak tuah ningkeel hna cu minung nunnak umtuning kha phundang in a khondennak kha ruat loin an um kho lo.
Khualipi hna thlitu thurhnawmhnak le ngandamnak a khondennak
Tahchunnhnak in kan chim ahcun tuchan ahhin a khannak ningin si loin, sikaan zulh loin an sak ciomi khualipi hna a karhnak kha nan theih cio lai. Khualipi hna ahcun mawtaw hna le sehzung nganpi hna in an chuahtermi sivai a simi datkhu hna ruangah thlitu a thianlo lawng siloin sikan ngeih lonak, sifah harsatnak, phawrh kuatnak ningcang a ṭhatlonak, awthawng hna hnachet tuknak, kharkhumh bantuk in hmuh duhmi hmuh khawh lonak hna ruangah umnak caah ngandamnak he aa tlak lomi hna kha kan hmuh.
Khualipi tampi hna cu an kautuk i innsak ningcang a feh lonak, ti le lektrik mei hna kha luantuk in an hmanmi hna hmuh khawh a si. Innpa chakthlang inn lo timhlamhnak simanking cheukhat ah minung a chahtuknak, sikan ngeih lonak, ceunak mei le thli luhchuah ṭhatlonak, hmunhma kaupi um lonak hna he an tong. Minung hi kokek pawngkam he zungzal in i tonnak um loin, minung vawlei hna, canphio hna, thirkhenh hna, tlanglang khuhmi inn hna ah kharkhumh i tet ngai in a um dingmi saram an si lo.
Cheukhat khuate hna ahcun hmun kaupi hna kha pumpak ngeihmi hmun ah ri an khiah caah, aa dawhmi khuacuanhnak hmun hna ah mi tampi an kal kho lo i, khamh an tong. Cheukhat hmun hna ahcun kokek pawngkam a thiangmi innlo saknak simankung an tuah ko nain lungthin daihnak a deumi thil hna caah lenglei minung chuahluhnak hna kha an khap. Atu le atu ti bantuk in khualipi hna i sang le vang cheukhat hna ahcun aa dawh i ṭha tein an sakmi, ṭihnung ral a thiang i thlitu thurhnawmhnak a thiangmi hmun hna kha an ser ko nain mi sifak hna tamdeuh an umnak sang le veng hna ahcun hi thil hna kha kan hmu hna lo.
Zatlang nunphung ah a hnu zulhnak
Vawlei cung khua zakip ah a cang liomi aa thlennak hna cu zatlang nunphung ramchung zong kha fakpi in a khonden ve. Seh lei he pehtlaimi ningcang fimnak a karhchonak ruangah rian khiahnak ah harnak a umnak, zatlang nunphung ningin hnon an sinak hna, ti le lecktrik thazaang hna kha a tluktlak loin ṭhencheu in hmannak ningcang, a dang zatlang nunphung bawmhchanh rianṭuannak hna, innchungkhar le zatlang nunphun phu ningcang aa ṭhencheunak, ṭhihphaihnak a tam chinchin nak, zatlang nun phung ningin ri lonhnak, sersatnak a phunphun a chuahnak, rihai sii hna zuarnak, mino hna nih rithai-sii an hman a tam deuhnak, thi cawh ruangah phun hram a lohtlaunak, tiah harnak piahtana hna kha kan hmuh. Hi thil umtuning kha kan zoh tikah a luan ci akum (200) chung i mi hna kakip ṭhanchonak le mi vialte caah khuasak tintuknak a dot a ṭhanchonak leiah chanhpiaknak a umlomi kha kan hmuh.
Caan karlak cheuchum i zawtnak hmelchunhnak a simi zatlang nunpun he pehtlaimi zawnruahnak nunphung tuahtawn ningkeel hna a zornak, chungkhat innchungkhar hri a cahnak hna, zatlang nunphun phu hna rianṭuan hmual a ngeih lonak hna a chuahmi kha a langter.