3 January

John 1:19-28

Tipil petu Johan nih amah le amah tehte a khannak

‘Ho dah na si? Nangmah le nangmah zeitindah naa hmuh?’ Nihin tiangah pakhat le pakhat kan i hal tawnmi biahalnak hna an si. Asinain nihin ah hi biahalnak hna hi ahleiin kanmah le kanmah kan i hal i kawlnak meiinn kha kan chunglei ah kan mer: ‘Keimah cu ahodah ka si? Zeitindah keimah le keimah kaa hmuh?’ Kan vawlei a harmi ahhin hi hna hi biahalnak sawhsawh an si lo. Ready-made identity a kan pek duhmi tampi an um. Cu hna lak i cheukhat cu aa pehtlaimi an si. Mi tampi nih an kan zoh i ahodah kan si ti an hngal duh lo; kan cungah an chiah duhmi sining lawng kha an hmuh. Asinain kan sining taktak kha khoika ah dah hmuh khawh a si timi hngalhnak ṭha deuh kan ngei.

Nihin thawngṭha ah, Tlangbawi cheukhat le Levi mi cheukhat cu Tipil petu Johan sinah an ra i: “Ahodah na si?” an ti. Hi biahalnak hi theih duh ruangah si loin lunghrinhnak in a khatmi a si. Zeicatiah tipil petu cu khuaruahhar a simi sining a si caah a si. Isaiah bantukin aa thuam, a der, a har, a ralṭha i a rianṭuannak kong a thukmi hngalhthiamnak a ngei i a fekmi dinfelnak le biakhiahnak a ngei. Amah cu tlangbawi Zekhariah fapa a si nain Biakinn he pehtlaihnak zeihmanh a ngei lo. A bia le a cawnpiaknak ngaih duh ah mi tampi nih a sinah an ra. Na hngalh ko lai, cu lio caan ah mibu pumh cu ṭihnung a si, ahleiin Israel cu Rom hremnak le uknak tangah a um caah le mah nih hin fawi tein ralchanhnak le Roman cozah nih a ralchanhtu pawl a hrem khawh hna caah a si.

Mithiang Johan nih a toidornak langhternak in a sinak kha a hngalh. Pathian thlahmi profet ka si tiah a ti. Messiah ka si tiah a ti khawh fawn, ahleiin a chan chungah ahmaan lomi messiah zeimawzat an rak um caah a si. Asinain toidornak a ngeih caah amah le amah cu Messiah ti loin Bawipa lam a sialtu lamkaltu sawhsawh ka si tiah a ti.

Kan cungah a tlungmi cu kanmah le kanmah kan i porhlawt. Caan tampi ah, kanmah le kanmah kan i ṭhanchoter khawhnak ding caah, mipi nih an uar ngaimi minung cheukhat hna he pehtlaihnak ah kan i chiah tawn, cu hna cu: ramkhel rianṭuantu hna, sibawi minthang hna, tlangbawi le bishop hna le a dangdang hna an si. Asinain hi cu kanmah kan si lo. Kan theihmi hna he kan i pehtlaih deuhdeuh tikah, kan sining taktak cu theih loin a um deuhdeuh. A herhmi cu toidornak a si. Zeicatiah toidornak hi thlarau nunnak ah hlawhtlinnak hmuh khawhnak ding caah a herhmi lungput a si. Mah le mah i porhlawtnak paoh cu toidornak lam ah dawnkhantu a si. Toidornak taktak cu dirhmun langhter a silo. Mah le mah i hlawt zungzal le mah ruahnak he aa dang hmanhah Pathian lamhruainak cohlan awkah lungtho tein um a hau.

Dawtmi ulenau hna, toidornak nih cun lungthin tak le dinfelnak a herh, ngakchia tete bantukin a chuahkehnak in a chuakmi thil le nunnak cohlannak cu upa sining a harmi he aa ralchanh, a hmaihuh tampi he, a thupmi huatnak le thleidannak hna he. Aa kalhmi cu aa porhlawmi le a ṭhawngmi nakin aa toidormi nih midang sinin upatnak a hmuh deuh ti hi a si. A toidormi nih cun a ngeihchiah le a hlawhtlinnak kha amah ta ah a ruat lo i lawmhnak bia kan chim awk a simi Pathian laksawng ah a ruat.