Innchungkhar Kong

(b) Khrih cu Khrihfa bu Lu asi bantukin Vale zong nupi le Lu nan si awk asi. (Efesa 5:23)

Innchungkhar pakhat ah hin Vapa hi Chungkhar uktu asi. Nangmah cu nupi na si ah cun na vapa kha pakhatnak ah hmun na pek lai. (1Peter 3:1) tiah a forhfial. Cucu ah nupi hna cu vale kha nan upat hna lai. Vapa zong nih chungkhar uktu he aa tlak in innchungkhar hna kha na hruai hna lai i zaangfah zawnruahnak thinlung na ngei lai.

Chungkhar pakhat ah Chungkhar hruai taktak a um lo ahcun ningcang lopi in a si tawn. Voikhat ah sang pakhat i inn pakhat ah an au, an khaung, an i sik thawng kan theih caah ralreng palik pawl nih “Hi innah chungkhat lu bik ahodah asi, tiah an hal tikah athin ngaimi nutung nu nih,

Kannih zong hi inn uktu ahodah asi, ti theih kan duhngai ve, Cucaah atu bantukin aphi kan kawlnak asi,” tiah a leh hna.

 Pa cu Chungkhar uktu asi ahau. Pa cu a nupi ruahnak kha upatte in angaih ahau. Asinain apalh, ahmaan ti cu aruah lai i ahmuh tik lawngah nupi ruahnak paoh khka tuah aherh lem lo. Innchungkhar uktu Pa cu a hmaan i afiang cikcek mi biacahnak a tuah khawh lai.

“Herod Siangpahrang cu anu pi Herodias le a fa nu bia kha arak ngaih hna lo. Sualnak a ngei lo mi Mithiang Johan Baptista lutan dingin an rak halnak cu apalh ti Herod Siangpahrang nih arak theih ko. Asinain mi hmai a zoh hna caah Mithiang pa kha thahnak nawl arak pek hna cu a palhmi asi.

Nikhat cu Nu pakhat ni a fale (7) kha a auh hna i, Ka fapa, ka fanu le hna fimte in um uh, nan nu bia hi ngai uh, “Zarhteni” a phak tik paoh ah a nu bia angai bik mi cu laksawng kan pek hna lai, tiah ati hna. Cutik ah ngakchia pawl nih, “Cucu ka nu na ding lo, na chimmi paoh atuah mi ka pa nih pei laksawng a co lai cu!” tiah hmunkhat tein an leh, anti.

Vancung Kutka innka nganpi pawngah mitampi cu artlang in an dir. “Vawlei cung na nun lio i a nupi aṭih mi hna nih kehlei ah nu pawl he artlang in dir ve uh, Vawleicung na nunlio i a nupi aṭih lomi orhlei kam ah a dangte artlang in dir uh,” tiah a chim tikah kehlei kam ah mitampi artlang in an dir kha a hmuh hna i pakhatte lawng nih arhlei kam ah a va dir. Cu tikah St. Peter nih,

“Nangmah hi Vawlei nanun lio ah a nupi aṭih lo mi Chungkhar uktu na si maw?” tiah ahal i mipa nih Vawlei ah “Keimah zong nupi aṭihmi ka si ve ko. Atu zong ah hin keh lei i a dir ve mi ka nupi nih orhlei kam ah va dir a ka ti caah asi,” tiah a leh ti asi.

Vapa cu Chungkhar uktu he aatlak te in hruai ding asi. Pa cu innchungkhar a  ṭuanvo hna kha ahruai lai i ṭuanvo tlamtling tein a ṭuan lawngah a Chungkhar kha a daihter a    ṭhanchoter khawh lai i amah zong hihnu nunnak ah zungzal nunnuamhnak cu a co khawh lai.

Voikhat ah Pa asimi pakhat cu Chunkhar kong ṭuanvo kha tlam atlinh le hlei ah a aakhuang ahro hna i innchungkhar lungrawih ngai in a chiah hna. Chungkhar kongah ningkel lo in aum i innchungkhar an ning a zakter hna i Pathian zong philh in khua arak sa. Nikhat cu, cupa cu athih tikah, Biakinn ah Missa he ruakvui ding in innchungkhar nih timhtuahnak an ngei. Missa Chung phungchimnak caan aphak tikah Biakinn uk Siangbawipa nih Chungkhar hna hnemhnak in, “Nihin Jesuh Khrih ah aa hngilhmi Pu Jacob cu Khrih arak zumhmi pa asi i Vancung pennak ah Mithiang Vanmi hna he Pathian  ṭang chungah a phan cang” tiah a bia a dongh in cu athimi pa i afa pa hniang nih a nu kut kha a sih i, …

“Ka nu, Siangbawipa a chimmi hi ka pa asi taktak hnga maw, tiah rauh kuang va hun in zohtuah u sih!” tiah a ti. Pa ṭha hna cu fale nih bochan le zumhnak ngeih dingah i zuamin um hrimhrim a hau. Vancung nunnuamhnak cu midang kha a kuat piak khawh asi lo. Mah pumpak nih i zuam in hmuh awk kha asi deuh.