December 30 – Christmas ni 6nak

Luka 2:36-40

Mi cheukhat cu an tar tikah an thin a phang, an lungre a thei, an i zumh lo i an thin a hung. Asinain a dang zong an um ve i an tar tikah dawh tein le ṭhatnak he an tar. Tahchunhnak ah: Miguel Cervantes nih Don Quixote cu kum sawmsarih a si dengmang lioah a rak ṭial. Noah Webster nih kum sawmsarih a si ah a liannganmi biafang cauk a ṭial. Socrates nih kum sarih a si ah a fimnak fimthiamnak a pek. Clara Barton nih American Red Cross cu kum sawmnga le pakua a si ah a dirh. Benjamin Franklin nih kum sawmriat le pakhat ah U.S. Phunghrampi sernak ah a bawmh. Benjamin Disraeli cu kum sawmsarih a si ah England ram ah a voihnihnak Prime Minister a hung si. Thomas Edison cu kum sawmriat le pathum a si ah a laboratory ah rian a ṭuan. Giuseppe Verdi nih Te Deum cu kum sawmriat le panga a si ah a phuah. Michelangelo cu kum sawmriat hrawng a si lio ah a thiamnak cheukhat a suai hna. Galileo nih a hmuhmi thil nganbik cu kum sawmsarih le pathum a si ah a tuah. Cun nihin thawngṭha relnak ah kum sawmriat le pali a si lio hmanh ah biakinn ah profet nu dirhmun in a cawlcang ngaimi Anna kan ngei.

Nihin thawngṭha caang dah ti lo cu Anna kong zeihmanh kan hngal lo. Anna cu nuhmei a si. Nuhmei a si ko nain biakha, thinhunnak le himlonak a ngeimi a si lo. A tar cang nain ruahchannak a ngol bal lo. A tarnak nih Pathian cungah a ruahchannak a thah lo.

John Powers nih a cauk, The Unoriginal Sinner and the Ice Cream God timi ah Conroy timi ngakchia pa nih Pathian sinah cakuat a ṭial tiah a kan chimhmi he aa lo lo. Mi nih an tar a hau timi kongah a phunzai.

Pathian caah bia a chim tikah, upa hawikom pakhat nih Conroy sinah cakuat a ṭial i, “Na ruahnak hi ka khuaruah a harter tawn. Keimah caah cun, vawleicung caan dawhbik cu tar pawl an si. Annih cu ka minung ni tlaknak an si” a ti.

Anna nih nuhmei a si lio le a tar hnuah a tuahmi thil pahnih a um:

Pakhatnak ah, Pathian biak kha a ngol bal lo. Pathian mi hna he hmunkhat ah Pathian biakinn ah a nunnak a hmang. Nihin ah Pathian nih a Khrihfabu cu zumhnak ah kan nu si dingin a kan pek. Amah a biami miphun pakhat si kan philh tikah man ngei lomi ro kan i fir.

Cun a donghnak ah, thlacam a ngol bal lo. Biakinn ah Missa kai bantukin mipi biaknak cu a ṭhatuk; sihmanhsehlaw thlacamnak bantukin pumpak biaknak zong a lianngan. Mi pakhat nih a chim taktak bantukin: “Anmah lawngin thla a cam hmasa mi hna cu hmunkhat ah thla an cam ṭibik” a ti. Kum tampi nih Anna cu thinhunnak, thinphannak, lungretheihnak, ṭihnak le himlonak um loin a chiah, zeicahtiah nikhat hnu nikhat Pathian he pehtlaihnak a ngeih peng. Pathian cu ṭhawnnak hrampi a si i a ṭhawnnak thawngin kan derthawmnak cu a tling.

Anna nih biaknak a ngol bal lo. Thlacam cu a ngol bal lo. Amah cu zumhnak le ruahchannak a ngol bal lo. A donghnak ah, Anna cu caan saupi an rak hngahmi Messiah, Jesuh Khrih a hmuhnak thawngin Pathian nih laksawng a pek.

Dawtmi nulepa ulenau hna, kannih tah zeitindah kan tar lai? Thil tikhawhnak asiloah thinhunnak he dah?