PATHIAN NIH A KHUAKHANNAK KHA A TUAH: PATHIAN ZOHKHENHNAK

            Sermi thil hna hi mahle ṭhatnak, le tlinnak kha an ngei cio i, cucu sertu kut in tlingcia in a rami an si lo. Anni tinhmi an phanhnak hnga Pathian nih a hruai hna i a bawmh hna. Cucu Pathian zohkhenhnak kan timi cu a si.

            Pathian zohkhenhnak kong hi Bible nih fiang tein a chim. Pathian nih zeizong vialte kha a zohkhenh dih, a hmebik thil hna in Van le Vawlei tuanbia ah a cangmi thil nganngan hna tiang a zohkhenh hna. Cathiang nih thil a cangmi hna cungah Pathian nih a uk cikceknak kong kha hmual ngei ngai in a chim. “Kan Pathian cu Van hna cungah a um: a duhmi paoh kha a tuah khawh” (Ps. 115:3). Khrih zong cu bantuk cun a si ve. “A hun i ahohmanh nih an khar lai lo… a khar i ahohmanh n ih an hung lai lo (Bia 3:7). Phungtlukbia nih a chim bangin a si ko. “Minung lungthin chungah khuakhannak a tampi ko lai, sihmanhsehlaw Pathian tinhmi lawng a hmun lai” (Phungt. 19:21).

            Jesuh nih ngakchia bantuk in Pathian zohkhenhnak cungah i bochan kha a duh. “Cucaah, Zeidah ka ei lai? asiloah zeidah kan din lai? tiin nan lungretheih hlah u, Vancung i a ummi nan Pa nih nan herhmi vialte kha a hngalh ko. Sihmanhsehlaw a pennak le a dinnak kha kawl hmasa u law hi thil vialte zong nanmah ta an si dih lai” a ti (Mt. 6:31-33 cf. 10:29-31).

            Pathian cu a khuakhannak vialte a uk dihtu Bawibik a si. Sihmanhsehlaw a khuakhannak kha tuah awk ah a sermi hna i bawmhnak kha a hman. Mah a hmannak cu a derthawm, a santlaihlo ruangah a si lo, a lianngannak le a ṭhatnak ruangah a si. Zeicahtiah Pathian nih a sermi hna kha umnak lawng a pe hna lo, anmah tein thil tuah in hmaihngalnak kha a pek hna. An sining cio in si hna seh, ti a duh hna. Cu ticun a khuakhan tlinnak ah aa bawmh ter dih hna.

            Pathian nih mah zohkhenhnak nawl kha minung sinah a pek i vawlei kha tei awk le sermi thil vialte uknak nawl kha a pek. (Gen 1:26-28). Cuticun Pathian nih minung kha fimnak le sernak rian kha tlin ter awkah le anmah le an minung hawi ṭhathnemnak caah rianṭuan awk ṭavuan kha a pek. Pathian duhnak in rian tuanmi kan si ti kha hngal lem loin Pathian khuakhannak chungah khan an rian ṭuannak, an thlacamnak le an sifah temhnak he khan an lut cio ko. (Cf. Col. 1:24). Cutikah annih cu, “Pathian rianṭuan hawi”, a pennak caah rianṭuantu ah an cang dih. (ICor 3:9, IThess 3:2, Col 4:11).

            Pathian cu a sermi hna an rianṭuannak vialte chungah rian a ṭuan ko, timi biatak hi sertu Pathian cung zumhnak he ṭhen khawh a si lo. “Pathian a lungtlinnak kha nan duhnak hnga le nan tuahnak hnga caah Pathian cu nan chungah rian a ṭuan ko” (Phil 2:13 cf. ICor 12:6). Mah hna nih hin minung hmaihngalnak (mithmai ṭhatnak) kha a zawr ter lo, a ṭhan tr lehlam: Zeihmanhlo chungin Pathian ṭhawnnak, fimnak le ṭhatnak in a rak chuakmi a si bangin a thawhkehnak Pathian he a hram chah a si ahcun zeihmanh a tuah kho lo, zeitintiah “Sertu locun sermi cu a lotlau ko”. Pathian velbawmhnak le cun hmanungbik a tinhnak kha a phan kho lo. (Cf. Mt. 19:26, Jn 15:5, 14:13).

            Zeizong vialte a tuahkhotu Pathian, hi vawlei kha remte le dawh tein a sertu Pathian nih a sermi vialte kha a zohkhenh hna ahcun zeicadah Vawlei cungah ṭhatlonak hi a um hnga? Mah biahalnak hi hrialkhawh lomi le a fak ngaingai mi khuaruahhar awk thil a si caah ṭukṭak in aphi pek ahcun a za lai lo. Khrihfa zumhnak a zapi tein zohnak lawng nih hi biahalnak kha a phi a pek khawh. Sernak a ṭhatnak, sualnak le Pathian lungsau thinfualnak le a dawtnak, a Fapa nih minung khamh awkah minung cannak a laknak, Thlarau laksawng a kan peknak” a Bupi, Sacrament ṭhawnnak le thluachuah nunnak vialte hi an i tel dih. Khrihfa zumhnak bia vialte hi ṭhatlonak kong aphi he pehtlaihnak a ngei lomi pakhat hmanh a um lo.

            Zeicahhen Pathian nih Vawlei hi ṭhatlonak zeihmanh umlo in a tlingin a ser hnga lo? Relcawklo a ṭhawnnak in Pathian nih mahnak in a ṭha deuhmi kha a ser khawh ko. Sihmanhsehlaw relcawklo a fimnak le a ṭhatnak in Pathian nih hi Vawlei hi khual a tlawng lio mi, a tlinnak leiah a kalmi siseh ti kha a duh. Pathian khuakhannak chungah mah bantuk cun a sinak hnga a cheu thil kha i lang hna sehlaw a cheu thil kha tlau hna seh, a satu le a hrawktu um hna seh, ti kha Pathian tinhnak chungah a um. Pumsa ṭhatnak le ṭhatlonak cu sermi hna nih tlinnak ah an phanh hlan lo a um peng ko lai.

            Vanmi hna le minung hna hi fimnak le luatnak a ngeimi an si caah anmah duhnak in an kawltung cu an nit him. Cucaah an pial kho. A si, an sual. Cuticun ziaza ṭhatlonak hi vawlei ah a lut. Pathian hi dairek in siseh, indairek in siseh a ṭhalo mi ziaza hrampi cu a si lo. Sihmanhsehlaw ṭhatlonak kha a awnh cucu sermi hna an luatnak kha a upat i, khuaruahhar awk in zeitindah mah hna chung hin ṭhatnak a rak chuah lai ti kha a hngalh caah a si.

            Vawlei cungah Pathian zohkhenhnak nih a ṭhalo mi chungin a ṭhami a chuahter khawh ti zong kan hmuh. Joseph nih a unau hna sinah hi tin a ti hna, “Hika ah a rak ka thlahmi hi nanmah nan si lo, Pathian a si… Nannih nih ka cungah ṭhatlonak kha tuah nan duh, Sihmanhsehlaw Pathian nih ṭhatnak caah a rak ruah: mi tampi an nunnak hnga caah a si”. (Cf. Gen 45:8, 50:20, cf. Tob 2:12-18). Vawlei cungah a ṭhalobik mi sualnak nih a chuahpimi, “Pathian Fapa ngeihchunh kha an hlawtnak le an thahnak nih Pathian velngeihnak a tam chinchinmi a ṭhabik thil kha a chuahter”. Cucu Khrih thangṭhat a sinak le kanmah khamh kan sinak hi a si. Sihmanhsehlaw man vialte ruangah ṭhatlonak cu ṭhatnak ah an cang bal lo.

            “Zeizong vialte ah Pathian nih amah a dawmi hna caah cun a ṭhami kha a tuah ko ti kha kan hngalh” (Rom 8:28).

            Pathian hi Vawlei le Vawlei tuanbia Bawipa a si ti kha fekte in kan zumh. Sihmanhsehlaw a kan zohkhenhnak lam hi kan hngalh ṭheu tawn lo. Caan dongh tik lawngah a tlinglo mi kan hngalhnak hi a dih lai i Pathian kha hmaitonh tein kan hmuh tikah Pathian nih a kan hruaining kha tling tein kan hngalh te lai. (ICor. 13:12).