December 29

Luke 2:22-35

Biakinn chung i langhternak

Nihin i thawngṭha catlang cu Biakinn ah Bawipa langhternak kong a si i Thawngṭha bia kan ngaih tikah kan ruah awk thil pahnih kan hrawmh hna lai:

Pakhatnak cu Mithiang Luke nih voi zeimawzat a chimmi, Nawlbia kha a si. Thluachuak Nu Mary le Mithiang Joseph nih zeizong vialte hi nawlbia ningin an tuah. Tahchunhnak ah, thluachuak ngaknu nih a Fapa upabik Jesuh a hrin hnu ni sawmli ah toidor tein thianhnak caah aa pe. Pathian Fapa cu Pathian sinah pekchanh a herh lo hmanh ah a Fapa hmasabik kha Pathian sinah a pekchanh. Asinain nawlngaihnak he nawlbia kha a zulh.

Hi nawlbia hi Moses nih Judah mi hna sinah a pekmi a si i, cu nawlbia nih cun nu cu nau a pawi hnuah ni sawmli chung a thiang lomi dirhmun ah a um lai i mipi hmai ah a lang lai lo tiah a ti. Ngakchia cu ngaknu a si ahcun ni cu a let hnih ah a cang. Ni sawmli a dih tikah, nu nih Pathian sinah raithawinak caah tuufa pakhat le laileng pakhat asiloah ṭhuro pakhat kha Biakinn ah a rak put hna. Mah hna cu phungning in a thurhnawmhnak in thianh awkah tlangbawi nih Pathian sinah a pekchanh hna i a hlan i a covo hna kha a pek ṭhan hna. Mirum siseh, sifak siseh, sual thawinak caah mi vialte sinin ṭhuro pakhat hal a si; sihmanhsehlaw tuufa pakhat man cu sifakmi hna caah a tamtuk caah, hi hna nih hin a pahnihnak laileng pakhat kha an thlen khawh. Chungkhar thiang caah cu bantuk cu a si, tiah Cathiang nih a kan chimh.

Nawlbia nih fapa upabik kha Pathian sinah pekchanh ding zong a fial. A langhter hnuah ngakchia cu tangka tlawmpal le mah puai ah pekchanhmi raithawinak tlawmpal in tlanh a si lai. Mary nih mah nawlbia vialte kha tling tein a zulh. Phunglam ah a biapimi thil lawng si loin upadi vialte kha fek tein a zulh.

St. Joseph le thluachuak Nu Mary he kan i dang, annih nih nawlbia kha a dongh tiang an zulh i kannih nih nawlbia hrial awkah tukforhnak kan tong. A herh lomi upadi buarnak kan tuah ahcun upadi kan zulh lai maw zulh lai lo ti kha kan i al colh. Na hngalh ko, a Thiang Chungkhar nih an langhtermi zohchunhawk nih thazaang a kan pek, phunglam zulh a herh lo hmanh ah lungthin dihlak in an zulh. Kannih zong nih kan tuah khawh ve sehlaw ka duh.

Pahnihnak cu Simeon nih Thluachuak Nu Mary sinah Jesuh cu aa kalhmi hmelchunhnak a si tiah a chimmi kha a si. Jesuh cu aa kalhmi hmelchunhnak a si i a zultu hna zong aa kalhmi hmelchunhnak si dingin a auh hna. Nihin kan caah zeitluk in dah ahmaan. Nikhat hnu nikhat Khrihfa zumhnak cu kan vawlei lam he aa ralchanh chin lengmang: nunnak nunphung le thihnak nunphung, chungkhar sining taktak le nuamhnak pumpak duhnak, pehtlaihnak le luatnak a kan petu biatak. Khrih hnuzulh asiloah Khrihfa taktak nun cu tuchan ahcun mipi nih an duh ti lo i nunphung he aa ralchanh chin lengmang. Khrih kan zulhnak nih midang lakah thleidannak a kan ngeihter hrimhrim lai. Vainam nih kanmah kan thinlung zong a kan chunh lai i cu caan a phak tikah cun kan thinlung ah a um taktakmi kha a langhter lai. Dawtmi nulepa ulenau hna, Zumhawktlak tein Amah zulh dingin bia kan khiah ahcun Khrih ṭanh maw, Amah doh dah kan si timi fiang tein biakhiahnak tuah hna usih. Adang lam pathumnak a umlo.