Holy Family Puai

Daily Reflection (A thiang innchungkhar) puaini (Holy Family)

Holy Family Puai -Sualnak a ngei lomi ngakchia hna

Matt 2:13-15, 19-23

Izipt ram ah zamnak

Nihin cu Ninos Inocentes asiloah Sualnak a ngeilomi athiang ngakchia hna puai a si. Hi Puai nih hin “kum hnih in a tanglei” ngakchia pa pawl kha nahchuahnak a ngeimi le a lung a tling lomi Siangpahrang Herod nih a thah hna kha a philh lo, amah cu siangpahrang chuakka kong a theih. Mi vialte hi a bawiṭhutdan caah ṭih a nungmi an si i zeitik caan paoh ah anmah nih bawiṭhutdan in an ka ṭhumh lai tiah a ruah. Hihi a nupi Mariame a thahnak a ruang cu a si; Mariame fapa pahnih, a pu le a pi; a fapa pahnih, Aristobulus le Alexander zong a nawlpeknak in a thah hna. Henri Daniel Rops nih a cauk, Jesuh le a caan (Jesus and His Time) (vol. 1, pp. 127-128) ah a donghnak kum hna ah Herod cu thi kalnak lam zawtnak a ngei tiah a ti. A fahnak a fak tuk i lungthin le pumsa leiah a ṭha lo. A duhnak kha voithum tiang a thlen. Amah a thih tikah, a thlan cungah mitthli mithli hna tla hnga seh tiah Judah mibu tampi thah dingin nawl a pek hna.

Herod nih Mifim hna cu ka sinah an kir ti lo ti a hngalh tikah a thin a hung tuk. A thinhunnak ah, Bethlehem khua i kum hnih tang le a pawngkam ummi ngakchia pa paohpaoh kha thah dih dingin nawl a pek hna. Hi sualnak a ngei lomi fahnak a ingmi hna hi Khamhtu martar phu hna i pangpar le theipar hmasabik hna an si; vawlei cu, an hngal bal lo i a ṭihnung zong an ton bal lo buin, an tei.

Sualnak a ngei lomi hna puai ah hin, ngakchia nuai tampi nih an nunnak, hmaizahnak le fimcawnnak le nunnak covo a hrocermi rel cawk lo thahnawnnak phunphun in fahnak an tuar i thahnak an in hna ti zong kan ruah: fihnung a simi sualnak a simi nau hrawhnak nawl a pemi upadi hna tangah; asiloah nulepa nih zohkhenh lonak le ngakchia rianṭuan ternak le tlaihhremnak phunkip ruangah sualnak ngei loin hremnak a tongmi tibantuk. Hi vialte nih hin lehrulhnak caah vancung ah an au. Hi bantuk thahnawnnak le tlaihhremnak nih hin nihin tiang hmanh ah ngakchia hna nih Herod pakhat lawng si loin ṭihawk tampi an ngei ti kha a kan hmuhsak.

Fale cu Pathian laksawng sunglawi an si ti kha philh hlah u sih. Khuaruahhar an sinak cu khuaruahhar a si caah le an lungput nih thazaang a pek caah laksawng ṭha taktak an si. Ngakchia hna nih Jesuh thinlung ah hmunhma sunglawi taktak an lak. A zultu hna nih an dawi hna tikah, a ralchanh in a tuah. A luhter hna i a don hna. Cun hitin a ti hna: “Amen, kan chimh hna, nan i mer i ngakchia bantuk nan si lo ahcun Vancung Pennak chungah nan lut kho lai lo. Hi ngakchia bantukin aa toidormi cu Vancung Pennak chungah anganbik a si. Cun hi bantuk ngakchia pakhat ka min in a cohlangmi paoh cu keimah a ka cohlanmi a si. Hi ngakchia hna lak i keimah a ka zummi hna lakah pakhat kha a sualtertu paoh cu amah caah cun an hngawng ah facang rialnak lungtum nganpi i thlaih hna sehlaw, rili cungah paih si hnasehlaw an caah a ṭhadeuh hnga” (Matt 18:3-6).

Dawtmi ulenau hna, cucaah a ra laimi caan ah, zumhawktlak le toidor tein um hna u sih law hi kan ram, Myanmar ah Amah Pathian kha zalonnak he biaknak kan ngeih khawhnak hnga caah thlacam hna u sih.