Christmas Puai

A luancia kum 2000 leng ahkhan Caesar Siangpahrang Ceasar Augustine nih ram pumpi milu rel dingin David hrinsor a simi poah nan chuahnak vawlei hmun cio ah cazin nan pek dih lai tiah nawl a chuah. Joseph zong David hrinsor a si i, a ṭhit mi Mary he Galilee ram, Nazareth in Judah ram Bethlehem khua ah an rak kal. Bethlehem khua i an caam lioah Mary cu a nithla a tling i fapa te a rak ngei. Annih cu khual riahnak hmun (khaan) an tin lo caah bawhte kha puan in an zual i caw rawl einak kuang chungah an thlim.

Cu khua i tuukhal hna cu leikuang ah an tuu cu zanṭim ah an khal hna. Pathian Vancungmi cu an pawngah a lang i “Nihin ah David khua chungah Bawipa Khrih timi mi khamhtu cu nan caah a chuak cang. Puan in an zual i caw rawl einak kuang chungah an thlimmi ngakchia (bawhte) cu nan caah hmelchunhnak a si lai” tiah a rak chimh hna. Cu Vancungmi he hmunkhat in Vanmi hna cu chikkhatte ah an lang i, “Van Siangpahrang, zungzal huham a ngeimi Pa Pathian cu thangṭhat si ko seh; Vawlei cung i lungthin ṭha a ngeimi cungah daihnak um ko seh” tiah Pathian thangṭhat hla an sa.

Tuukhal hna cu Bethlehem khua ah rianrang tein an va kal tikah caw rawl einak kuang chungah an thlimmi bawhte kha an hmuh i an biak. Cu hnu ah an hmuh an ton mi thil vialte kha khuazakip ah an chim colh. Tuukhal hna chimmi bia a theimi poah cu an khuaruah a har dih. Mary zong nih cu thil sining vialte cu aa cinken dih. Cu hnu ah tuukhal hna zong nih an sinah an rak chim chung mi bangin an hmuh an theih mi konglam vialte ruangah Pathian kha khuaruahhar in an thangṭhat i an kirṭhan.