JESUH KHIRH NIH A SERMI BUPI
A caan a tlin tikah Pathian nih a rak tinhmi khamhnak kong khuakhannak tlinh ding cu Fapa rian a rak si. Mah kha tlinter awkah Khrih cu thlah a rak si. Bawipa Jesuh nih Thawng`ha phuannak in Bupi hram cu a thawk. Cucu Bible chungah hlanliopi in rak kamh ciami Pathian pennak a ratnak kong kha a si. Pa Pathian duhnak kha tlinh awk caah Khrih nih Vancung pennak kha hi Vawlei cungah a luhpi. Bupi cu biathuk in a um cangmi Khrih pennak kha a si.
Hi pennak cu Khrih a bia, a rian`uannak le a umpinak in mi hmaiah a tlang. Jesuh a bia cohlan cu Pennak cohlan kha a si. Pennak thlaici le hramthawhnak cu Jesuh nih a pawngah a pumhmi tuurun fate cu an si i amah cu an mah tuukhaltu cu a si. (Lk. 12:32, cf. Mt. 10:16, 26:31, Jn 10:1-21). Annih cu Jesuh chungkhar taktak an si. (Cf. Mt 12:49). A pawng i a pumhmi hna kha tuahserning thar le thlacamnak kha a cawnpiak hna.
Bawi Jesuh nih Pennak kha a tlin hlan tiang a hmun ding in a rak dirh tak. Zeizong vialte hlan ah pahleihnih kha a rak thim hna i Peter kha lu ah a chiah. (Cf. Mk. 3:14-15). Israel miphun phunhleihnih can ah annih cu Jerusalem thar i hrambunhlung an si. (Cf. Mt. 19:28, Lk. 22:30, Bia. 21:12-14). Pahnleihnih hna le a dang zultu hna nih Khrih rian`uannak le `hawnnak kha an hrawm. Cu bantuk in a covo zong an hrawm ve. (Cf. Mk. 6:7, Lk. 10:1-2, Mt. 10:25, Jn. 15:20). Khrih nih a tuahsernak vialte in timhtuah in Bupi kha a dirh.
Bupi cu kanmah khamhnak caah Khrih a pumpeknak in hirmmi a si. Bawipa Thisa sernak ah a langhter chung i vailam cungah a tlinter. Bupi thawhkehnak le `hannak cu vailam ah tahmi Jesuh hnak in a luangmi thi le ti nih a hmuhsak. (Cf. Jn. 19:34). Zeicahtiah vailamtah cung thihnak in aa hngilh lioah khan Khrih hnak in khuaruahhar awk Bupi Sacrament cu a hung chuak. Eve kha aa hngilhmi Adam hnakruh in ser a si bang khan Bupi zong cu vailam cungah a thi i aa thlaimi Khrih lungthin chunhmi in hrin a rak si.
Pa Pathian nih Fapa kha hi Vawlei cungah `uan awk rian a pekmi a vun lim tikah Thiang Thlarau kha a Bupi thianter zungzal awk caah a rak thlah. (Cf. Jn. 17:4). Cu tikah Bupi cu mi zapi hmaiah langhngan in a lang i phungchimnak thawngin Thawng`ha karhternak hram cu a thawk. Bupi cu Khrih nih mi vialte kha a zultu siter hna awk caah a thlahmi phungchimtu (Missionary) a si. (Mt. 28:19-20).
Bupi cu a riant lam a tlinnak hnga caah Thiangthlarau nih laksawng a phunphun kha a tawih i mah tining cun Bupi kha a hruai. (Cf. ICor 12:27-30). Bupi cu mi vialte hna lakah Khrih le Pathian pennak kong kha thanh awk rian kha pek a si i vawlei cungah Pathian Pennak a thlaici le a hramthawhnak a si.
Bupi nih a tlinnak cu vancung sunparnak lawngah a hmuh te lai. Cucu Khrih a rak `um than caan ah a si te lai. Cu hlan vialte cu Bupi cu vawlei hremnak le Pathian hnemhnak lakah khualtlawngmi a si rih ko lai. Hi Vawlei ah Bupi cu Bawipa he a hlatnak ah `hawlnak a ing, ti kha aa hngalh i pennak tling a phanh lainak kha ngaihhlang in a um. A siangpahrang bawipa he sunparnak ah i fonhlainak kha hngah in a um. (II Cor. 5:6). Bupi le Bupi thawngin Vawlei cu harnak nganpi lo cun sunparnak ah a tling kho lai lo. Cu tik lawng ah Adam chan thawkin miding vialte, a dingmi Abel in hmanungbik thimmi tiang cu Pathian hmaika ah a ummi Bupi chungah hmunkhat in pumh an si te lai.