“Khrih ratnak caah i timhtuah ding, lenglei thilri parpavuan rianṭuannak ah tlau hlah uh”
Niza (Cawn nithum ni) ah Mithiang Peter Biakinnpi tual ah rak phanmi ramkip le holh phunkip a hmangmi mipi (General Audience) hna sin ah Pope Leo XIV nih biakchawnhnak le biacahnak a ngeih hna.
Christmas caan ah Khrih chuahcam kha ṭha tein kan cohlan i kan don khawh nakhnga Khrih Jesuh ratnak Hngah caan (Advent) ah timhtuahnak, thlacamnak le Pathian kong ahlei khunnak le hi caan a biapitnak kong a langhter.
Vatican ah Christmas thingkung le Bawipa Jesuh chuahcam ah tuah tawnmi cawrawl kuang le Bawinu Mary, naute Jesuh le Mithiang Joseph (Crib) nih a dawhtermi Mithiang Peter Biakinnpi tual cu zoh awk le len awk ah a ra mi zumtu hna sin ah, Pope Leo XIV nih Advent a biapitnak kong a langhter. December 17, Nithumni General Audience ah holh phunphun a hmangmi khualtlawngmi hna sinah biakchawnhnak le thazaang peknak a tuah.
“Nanmah pakhat cio, le nan chungkhar hna nih Pathian Fapa le vawlei Khamhtu a chuak tharmi Jesuh ratnak caah timhtuahnak ah nan caah a thiangmi hngah caan asi khawh nakhnga thla kan cam hna,” tiah Pope Leo nih Mirang holh a hmangmi zumtu hna sinah a chim.
Nativity hmanthlak (Crib) a biapitnak
“Christmas puai cu ni tlawmpal lawng aa duh cang. Cun nan inn ah Khrih Hrinnak Biathuk a langhtermi crib cu nan tuah, nan ṭamh dih cang lai tiah ka ruah,” tiah Italian zumtu hna sinah biakchawnhnak a tuah.
Cawnikhat, December 15 ah, Vatican i ṭuanvo ngeitu hna nih le Paul VI Hall hna ah (Crib) an tuahmi cu zapi hmuh awk in an langhter.
“Crib nih, kan zumhnak lawng si loin Khrihfa nunphung le zungthiamnak hna zong hi, minung a sinak thawngin ‘kan lakah um dingin a rami Jesuh philh lonak caah Christmas ah an i tel peng lai tiah ruahchannak ka ngei.”
Christmas ni cu zarhkhat lawng aa duh cang. Zumtu hna nih hi puai hi thukpi in nunpi ding le thil dang nih lung a buaiter nak hngalo, French holh a hmangmi hna kha thazaang a peknak a ngeih hna.
“Puai tuahnak caah timhtuahnak lawng kha i buaipi in kan i tel sual nakhnga lo ralring tein um hna u sih, cu nih cun a lenglei le a parpavuan lawng in hmuhtonnak a kan ngeihter lai i lungdonghnak a chuahter lai,” tiah a fianter. “Cu nakin, Jesuh kan hngah lio ah kan lungthin kha ralring tein le hliphlau tein umter awkah caan la hna u sih, cuticun a dawtnak in a kan umpinak cu kan nunnak le kan thinlung ah zungzal in ro a si lai.”
Hngah caan (Advent) nih “Jesuh kha lungthin dihlak in cohlan awk ah le Christmas caah timhtuahnak ngeih dingin a kan sawm” tiah German holh hmangmi hna sin ah biakchawnhnak a tuah.
“Amah cu kan ruahchannak a si.Cucaah, a chuahnak puai cu lunglawm tein hngak hna u sih law lungrual tein thlacam ṭi hna usih: ‘Ra, Bawipa Jesuh’,” tiah Pope nih a chim.
Ruahnak le thlacamnak caan
Advent ni hmanung bik hna cu dai tein khuaruahnak le thlacamnak caan si ding le Sualthlahnak Sacrament asiloah thlarau lei thazaang laknak in Khrih ratnak caah timhtuahnak ngeih ding in Poland holh a hmangmi hna sinah sawmnak le thazaang peknak a ngeih hna.
Portuguese holh a hmangmi zumtu hna sin ah “nunphung ah a rummi” an sinak le Christmas Novena caan ah zeitindah kan um ti kha langhternak in thazaang a pek hna.
Hi bantukin tuahnak ṭha le zumhnak lei i pekchannak nih “mi vialte caah lungthin a ceutertu caanṭha a si kho i Pathian Fapa chuahcam a nai cang caah timhtuahnak a si kho. Ruahchannak Bawinu nih kan umpi seh law nanmah le nan chungkhar hna kha in huhpheng zungzal ko hna seh,” tiah a chimchap.
“Khrihfa hna cu Pathian le innpa dawtnak ah an lungthin innka hun dingah auh kan si. Cuticun daihnak le lawmhnak taktak in kan khat lai,” tiah Pope nih Arabic holh a hmangmi khualtlawngmi hna sin ah biak chawnhnak a tuah.