16 December Tuesday

Matt 21:28-32

Fapa Pahnih Bianabia

Samuel Taylor Coleridge nih, Table Talk ah, hi bantuk mi lung a la khomi bia a chim: “Mi pakhat cu vancungmi si awkah a cunglei ah a kai lo ahcun, cu cungah i hngatchan, miṭhalo si awkah a tanglei ah a ṭum” a ti.

Hi bia hi mi lung a lak i ruah awk tlak a si, zeicahtiah a ṭha leiah siseh, a chia leiah siseh kan i thleng lengmang ti kha a kan theihter. Cun nihin i thawngṭha bianabia cu cukong tahchunhnak pakhat a si. Hi bianabia hi fapa tlau bianabia he aa khat. Bianabia pahnih ah fapa pahnih aa tel. Fapa upa deuh nih, ka kal lai tiah a ti nain ahnuah a kallonak cu Judah nawlngeitu hna nih Moses i Nawlbia kha fek tein an zulhnak thawngin Pathian an dawtnak kong an chimmi hmelchunhnak a si. Nunnak cu ṭha tein an thawk nain achia in an donghter, zeicahtiah cutin an tuah lioah dawtnak le zawnruahnak lungthin an ngeih khawh lo caah a si.

Fapa ngakchia deuh nih Judah mibu chungah misual tiah ruahmi hna kha a aiawh hna, ahleiin a fiang bikmi hna cu, ngunkhuai khawltu le hlawhhlangtu hna nih nunnak kha ṭhalo in a thawk nain ṭha tein a donghtermi hna kha a aiawh hna.

Bianabia pahnih hi hmelchunhnak an si. A sullam cu fapa pahnih nih kan hmaiah minung phun hnih an chiah i aho he dah nan i lawh tiah an kan hal tinak a si. Kan nunnak ah Pathian he aa naih deuhmi fapa pahnihnak bantuk kan si maw, asiloah kan nunnak ah Pathian he aa hlat deuhmi fapa pakhatnak bantuk dah kan si?

Hi fapa pahnih bianabia nih hin Pathian duhnak kan lehrulhnak pahnih zong a langhter. Pathian duhnak kan tuah tikah a thiangmi le a dingmi kan hung si lai. Cucu Jesuh i rianṭuannak cohlannak in a lang. Jesuh i rianṭuannak cohlan cu Nawlbia zulh a simi lamdik cohlan nakin a tamdeuh (Job 24:13; Phungthlukbia 8:20). Mah cu zeitik caan paoh ah Pathian sinah ‘A si-Yes’ ti a si. Pathian sinah ‘A silo-No’ kan ti caan tampi a um ko nain kan i thleng kho. Kan palh ti zong kan cohlan khawh i kan nunning zong kan thlen khawh. Cun John Henry Newman nih, “Nun cu thlen a si. A tlingmi si cu aa thleng lengmangmi a si,” tiah a ti.

Dawtmi ulenau hna, cucaah, kan nunnak ah Pathian duhnak kan hngalh a hau. Pathian nih zeidah tuahter a kan duh taktak. Cun Pathian duhnak kha kan tuah a hau. Loyola khuami Mithiang Ignatius kong ka relmi tuanbia bantuk tein a si. Loyola khuami Mithiang Ignatius nih nikhat cu Fr. Lainz sinah “Pathian nih atuah vancung kai ding maw asiloah a sunparnak caah thil pakhatkhat tuahnak caanṭha he vawlei ah um ding timi thimnak nawl an in pek sehlaw, zeidah na thim lai?” a ti. “Vancung kha tichia (သေချာ) hrimhrim dingin atuah ka tuah ko lai,” tiah Fr. Lainz nih a leh. “Aṭha,” tiah mithiang nih a ti, “Keimah leiin cun, Pathian duhnak tuah awkah vawlei cungah ka um ko lai. Ka thlarau khamhnak kongah cun, Pathian nih a ka zohkhenh lai ti ka zumh. Amah dawtnak ruangah vancung luh a tlaimi paoh kha a thihter hna lai ti ka zumlo” a ti.

Dawtmi nulepa ulenau hna, a donghnak ah, hi Arab phungthluk hi ruat hna u sih: “Pathian nawlngaih lo na duh ahcun, Amah nih an hmuh khawh lonak hmun kha kawl” ti a si.