15 December Monday
Matt 21:23-27
Jesuh i Nawlngeihnak Biahalnak
Samuel Smiles nih hitin a ti: “Miṭha pakhat hngalh khawhnak ding caah hneksaknak tampi a um, asinain a tlaubal lomi pakhat a um: zeitindah amah tangah a ummi hna cungah nawlngeihnak a hman?”
Jesuh a ral pawl, abikin upa hna le tlangbawi upa hna nih Jesuh nawlngeihnak kha biahalnak an tuah. Annih nih hitin an hal: “Zei nawlngeihnak in dah hi thil hna hi na tuah? Kumzabu tampi chung minung nih Jesuh kong he aa tlaiin hi biahalnak hi an tuah lengmang ti kha na hngalh. Fimthiamnak leiah Doctor na ngei maw?” Amah cu profet lawng siloin ziaza lei cawnpiaktu a si ti kha kan hngalh dih, a cawnpiaknak hna cu kanmah pumpak in kan lung a thawhter bikmi a si.
Amah kha ningzahnak pek lawng siloin a rianṭuannak dihlak hmanh ṭihnung ah chiah an duh caah a nawlngeihnak kha an hal. Asinain Jesuh nih an cungah thil sining kha a thlen. Bawipa nih ralṭhatnak le fimnak he, biahalnak dang pakhat in a leh: “Johan tipilnak cu khoika in dah a rat? Vancung in maw minung in dah a si?” Biahalnak nih an khuaruah a harter dih hna, zeicahtiah ‘Pathian sinin’ an ti ahcun Tipil petu mithiang Johan a zummi hna kha amh he an hlatter hna. ‘Minung sinin’ an ti ahcun, Johan an hlawt caah anmah le anmah dantatnak an pek hna. Cucaah a derthawmmi vialte lakah a derthawm bikmi lehnak in an leh: ‘Kan hngal lo” an ti. Jesuh nih biatak a chimh hna hmanh ah, an zum rih lo. Mithiang John Chrysostom (347 – 407) nih a chimmi bantuk tein a si “A chimh hna hmanh ah zeihmanh santlaihnak a ngei lai lo, zeicahtiah muihnak duhnak nih ceunak thil kha a hngal kho lo. Zeicahtiah a halmi cu kan cawnpiak awk a si; sihmanhsehlaw hneksaknak lawng a tuahmi cu ruahnak cheuhnak in kan hloh awk a si i biathli ṭhawnnak kha a sinah kan phuan awk a si lo”.
Fr. Pabs Tagura, SVD (Bible Diary 2008) nih nawlngeihnak cu ruahnak pakhat in hngalh khawh a si tiah a ti. Mi pakhat cu fimthiamnak a ngeimi, theihhngalhnak a ngeimi asiloah cawnnak rian pakhatkhat ah thiamnak a ngeimi a si ahcun nawlngeihnak a ngei. A thiamnak kong a chim ahcun mi nih an ngaih hrimhrim lai. Nawlngeihnak cu thimnak kalning in upadi nih mi pakhatkhat sinah pek a si ve. Mi pakhat nih ‘meithal, mifir le sui’ a ngeih ahcun nawlngeihnak le huham zong a ngeih khawh. Mao Che Tung nih voikhat cu meithal kuang chungin nawlngeihnak cu a chuak tiah a rak ti.
Jesuh nih a nawlngeihnak cu cunglei in a rami a si tiah a chim peng, zeicahtiah Pa duhnak tlinter awkah a ra (Phil 2:6). Jesuh i nawlngeihnak cu a nunnak chunglei rumnak le ahmaannak in a chuakmi a si, zeicahtiah amah cu mi vialte khamh awkah Pa i dawtnak a tlingmi langhtertu a si (Johan 3:16). Hihi ziaza lei nawlngeihnak kan timi cu a si. Jesuh cu demagogue (biachim a thiamngaimi) le vote hmuh aa zuammi politician a si lo. Zohchunh awk tlak in mi a hruai hna. A nganbik cu mi vialte sal a si lai i cucaah a Lamkaltu hna i ke kha a tawl hna. Redemptoris Missio nih Jesuh bia cu a nunnak in a luangmi a si caah ṭhawnnak a ngei tiah a ti. A phungchimmi le nunpi cu aa pehtlai.
Dawtmi ulenau hna, mipi upa hna le tlangbawi upa hna nih an theih awk a si i kannih vialte zong nih kan theih awk a si ve.