14December

Advent zarhpi avoi thumnak

A si. 35:1-6,10; Jeim 5:7-10; Matt 11:2-11

Dawtmi ulenau hna, nihin Advent a zarhthumnak i kan relmi thawngṭha ah, Tipil petu Johan nih Jesuh Khrih sinah lamkaltu a thlah hna i Amah cu an hngakmi Messiah a si taktak maw ti hngalh awkah a thlah hna. Cheukhat nih cun Johan nih Jesuh cu Messiah taktak a si le si lo kongah lunghrinhnak a ngei tiah an ti lai nain cucu ruah awk a tlawm bikmi ruahnak a si.

Tlangbawi pakhat nih a phungchimnak ah a chimning ahcun, Johan nih a nunchung vialte Judea ramcar ah a ra laimi Messiah hngak in a hman. Mi hna kha sual ngaihchihnak tipilin awkah a auh hnanak thawngin Messiah caah lam a sialpiak hna. Atu cu Herod Antipas sualnak a mawhchiat caah thonginn ah a ngaih a chia. Cu karlak ah Jesuh nih Messiah a si bantukin mipi rian a thawk. Thonginn chung i John tlawn le thazaang peknak bia kuat cu a buai lo. Khuaruahhar thil a tuah tiah Johan nih a theih. Zeicahdah a khuaruahhar thilti khawhnak kha Johan luatter awk le ahmaanmi siter awkah a hman lo? Chimchungbia nih Messiah hmelchunhnak pakhat cu thongtla pawl a luatter hna lai tiah a ti lo maw? John nih ahmasabik bawmhnak a hmumi hna lakah pakhat si dingin aa ruahchan ko lai. Zeizong vialte hnuah a hmasabik ah Jesuh tipil a petu cu amah kha a si. Pakhat le pakhat cungah zaangfah zawnruahnak te cu an ngeih ko lai. Cucaah Johan nih Jesuh theihter awkah lamkaltu a sinnah a thlah hnanak zong a si kho men.

Messiah nih misual pawl kha zaangfahnak ngei loin sual a phawt hna lai ti zong Johan lungthin chungah a lut kho men. Jesuh cu misual le biaknak a ngei lomi hna, mizaw le thilti khawhnak a ngei lomi hna nih an kulh ti a theih tikah a thin a hung men lai. Messiah cu aa toidormi, zaangfahnak a ngeimi le sifah harnak a tongmi a si kho ti cu Johan lungthin ah a rak lut men lai lo.

Jesuh nih a lamkaltu hna kha hitin a leh hna: “Va kal u law nan theihmi le nan hmuhmi kha Johan kha va chim u: mitcaw nih khua an hmuh ṭhan, kebei nih lam an kal khawh, thinghmui zawtnak a ngeimi an dam, hnachet nih an theih, mithi cu an thoṭhan i sifakmi hna nih an sin i chimmi thawngṭha kha an ngeih hna,” (vv 4b-5).

Phundang in chim ahcun, Jesuh nih a chimmi bia nganbik cu damnak kong hi a si. Mizaw le a thi dengmangmi hna kha sii loin a damter hna i a rianṭuannak caah tangka a lak hna lo – sibawi man zong a lak hna lo. Lungthin umtuning kong lei sibawi si awkah a cawng bal lo, asinain a hlatnak le a naihnak sibawi hna nakin lungthin a rawkmi tamdeuh a damter hna. Asinain a thih tikah, mi tlawmte lawng nih an zuunngaih, asinain sermi thil vialte nih an upat i rawhralnak nih a pum cu a tlaih khawh. Misual lawng nih Amah cu an hlawt nain zarhkhat ah voikhat, chawlehnak leengke hna cu an i din i mi hna cu thlacam awk, Amah upat awk le biak awkah pumhnak hmun hna ah an kal.

Hi damnak hi chunglei thlarau thluachuah hmelchunhnak zongah hmuh a si lai. Thlarau leiah mitcaw le kebai an si peng ahcun taksa mit le ke hmannak hmuhnak nih a donghnak ah zeidah a chuahpi lai? Pathian a um ti langhternak a biapimi hmelchunhnak hna cu thlarau lei an si;  thlarau lei ceuternak (mitcaw nih an hmuh, hnachet nih an theih) le nawlngeihnak pekmi cu (kebai nih an kal, mithi an thawhter) hnanak an si.

Dawtmmi nulepa ulenau hna a donghnak ah a tang i tuanbia te hi ngaih hna usih!

Hlanlio ah khan, rabbi pakhat nih vancung innka a kingh i Messiah cu hitin a rak ti: “Zeicahdah caansau na rauh? Minung nih an in hngak ti na hngal lo maw/”?

“Keimah kha an ka hngak lo,” tiah Messiah nih a leh. “Mi a cheu cu rumnak le tangka le chawva kha an hngak, a cheu nih cun midang cung i bawi sinak kha an hngah, asiloah anmah duhnak pennak kha an hngak” a ti.

Rabbi cu vawlei ah a ra kir, a zultu pawl kha a pumh hna i lungdongh lo dingin a kham hna: “Pathian i mang cu kan caah manh hram thawk hna u sih – kan hngahmi taktak cu aa thawk cang!” tiah a ti.