Kokek pawngkam zohkhenhnak
Timhlamhnak simanking pakhat suainak ah cu simanking ruangah a chuak kho mi kokek pawngkam khondennak kong kan ruah tikah cu timhlamhnak cu cungthap vawleiṭha, dinti le thli thurhnawmhnak kha zeitin zeitluk in dah a khonden khawh timi ruah chinh in, cu timhlamhnak ruangah thilnung saram hna cungah a khonden khawh mi ṭihnung ral kong ruahchihnak cu tlawmte lawng kan hmuh khawh i, aa khatmi thilnung hna le aa khatmi thingkung pangpar kung hna cu biapilo bantuk in rianṭuannak hna kha hmuh a si.
Lamsul lei pehtlaihnak caah khualtlawnnak lam nganpi hna cawhnak, cinthlaknak lei dum hna caah hmun kaupi hna kha hau kulhnak, tiva hna ah kahcham nganpi saknak le aa lawh dengmang mi ṭhanchonak lei timhlamhnak suai in ṭuanchuahnak hna ruangah, saram hna him tein an umnak tupi hna i ṭhencheu in an hmannak ruangah, saram hna caah umnak hmun an ngeih tilonak, an i ṭhenṭheknak, saram hna hmundang pengdang ah ṭhial khawh a silonak, zalong tein tlunkal khawh lonak hna a chuak. Hi hna pehzulh ṭhathnem lonak nih saram hna an phun a lohtlaunak kong kha kan hmuh.
Saram hna caah a himmi tupi hna kha rikhiah piak a simi bantuk in a dang timhlamhnak hna tuahpiaknak zongin a cunglei i langhtermi timhhlamhnak simanking a chuak khomi ṭhat hnemlonak hna kha a zorter. Sihmanhsehlaw cu bantuk hmuh chungnak chiah in rianṭuannak cu ram tlawmte hna lawngah kan hmuh hna.
Atu le atu ti bantukin ṭhanchonak sipuazi caah a miak chuahter dingin saram phun cheukhat kha sikaan ngei loin an tlaih an thah hna tikah cu hna an phun lohtlaunak ral in khamh i pawngkam kokek i cuaithlainak lei aa tluk lonak zohkhenhnak caah cu saram hna an rak hrinnak pungsan hna kha cheukhat hna caah lungthin bunh in ruahnak tlawmte lawng hmuh a si.
Kokek pawngkam kha ralring tein zohkhenh khamh rianṭuannak caah hmailei caan he pehtlaih in kuapi hmuh khawh a hau. Asinain atu caan te rianrang in ṭhathnemnak a miak hmuh dingin aa ruahchanmi hna cu pawngkam zohkhenh kilvennak kongkau ah an lung a lut lem lai lo.
Hi bantuk in mah cah ṭhathnemnak lawng a ruat i mi zapi ca ṭhathnemnak a zoh lomi hna ruangah a chuak dingmi rawhralnak man cu annih an hmuh hnga dimi ṭhathnemnak amiak nakin tampi a ngan deuh. Phun aa khatmi saram cheukhat hna rawh (thih) nak, ṭihnung ral an tonnak hna ruangah a chuakmi sunghnak cu aman a sang ngaingai.
A dang minung vialte le hmailei cipeh thar hna cu kokek pawngkam rawhralnak ruangah cham dingmi, a nganmi cham awk kha zoh loin, kannih mi phukhat hmuh dingmi ṭhathnemnak amiak pakhatte lawng kan zoh ahcun, ṭihnung ngaimi ningcanglonak caah ka i phih in, congoih soiselnak bia a chim lomi awthawng umlo mithmuh tehte hna an si lai.