13 December- Zarhteni
Sir 48:1-4, 9-11; Matt 17:9a, 10-13
Elijah ratnak kong
Christmas puai tuahnak ding caah timhtuahnak ah an sianginn auditorium (hallkhan) an ṭamhmawihmi siangngakchia phu pakhat kong hi ka rel. An caah vailamtahnak cu Christmas caan he aa tlak lo caah, vampang in hloh dingin an ruah lio ah, an saya, tlangbawi pakhat a lut i siangngakchia pawl kha vailamtahnak cu hloh lo dingin a forh hna. Amah nih, “Zeicahtiah, Jesuh Khrih a chuahnak a ruang cu vailamtahnak cung thih ding kha a si,” tiah a ti.
Kan chungkhat pakhatkhat a thih tikah kan nih cu aa tlak lomi a lo. Christmas caan chungah temhinnak le thihnak kong chim cu aa tlak lomi a lo. Asinain vailamtahnak cu Jesuh chuahnak he kan i ṭhen kho lo ti kha i cinken hna u sih. Nautatnak hmelchunhnak si loin sunparnak hmelchunhnak a si. Jesuh cu kannih kha thil ṭhalo paohpaoh chungin a kan khamh awkah a chuak.
Nihin thawngṭha nih hi profet lianngan pathum kong a kan chim: Elijah, Tipil petu Johan le Jesuh hrimhrim hna an si. Hi hna pathum nih hin Pathian nih Amah kong chim ding, dir in Pathian biatak kong chim dingah thlahmi kan si ti kha an hngalh. Biatak an chim caah an cungah zeidah a tlung lai ti an phang lo. Asinain mipi nih an bia an ngaih duh lo, an nihsawh hna, an soisel hna i an hlawt hna i hi profet pathum hna hi an no lio tein an thi.
Profet timi cu Pathian kaa a simi pakhatkhat a si. Pathian le mipi karlak ah Pathian bia chimh awkah a dir. Profet nih kaa in bia a chim tikah thawchuah hnawhmi le palhnak um loin a chim. Profet cu a theihmi bia a chim lengmangmi asiloah lungthin ngei loin a chim lengmangmi a si lo. Tuchan kan unau cheukhat hna cungah a tlungmi bantukin, profet bantukin um loin, Pathian nih a chimmi si loin midang nih an chimter duhmi kha an chim caah, puppets (ရုပ်သေးရုပ်) hna bantukin an um. Asinain profet nih cun Pathian caah bia a chim tikah Amah Pathian i duhnak, lungthin le ruahnak kha aa tlaih peng. Pathian nih a bia kha an kaa chungah a chiah hna lai (Deut. 18:18; Jer. 1:9). Profet cu Pathian sal (Zekh. 1:6) le Lamkaltu (2 Chan. 36:15) a si. Profet cu: hlen a hmangmi asiloah a bia ahmaan tiah midang a hlenmi pakhatkhat a si lo (Jer. 23); Lihchim asiloah Jesuh cu Khrih a si lo tiah a almi pakhatkhat zong a silo. Midang hlen a hmangmi cubantuk minung cu Khrih ral a si, Pa le Fapa kha a hlawt hna (1John 2:22); zumhnak a pialmi asiloah zumhnak ahmaan lomi (ahmaan lomi cawnpiaknak) a chim i Khrihfabu a ṭhencheutu (1Johan 2:19, 2Peter 2:1, 12); Pathian a thangchiatmi asiloah Pathian, Khrih, Thiang Thlarau, Pathian mi hna, Pathian pennak le Pathian sining hna kha a thangchiatmi (Judas 4, 10, 12, 13; 1Tim. 1:13); mi hlen hmang (Mk 13:22) mi a si. Thlarau lei hlennak cu ṭihnung taktak a si, zeicahtiah tlawmte ahmaan nain hlen a simi zumtu hna cu biaknak phung hna lakah hmuh khawh an si.