Pope Leo XIV nih Africa ram i Catholic saya (siang ca chimtu) hna sin biacah
Pope Leo XIV nih Africa ram i Catholic saya (siang ca chimtu) hna kha mino hna nih an kawlmi fimnak le ṭhanchonak caah ṭhathnemnak a pe khotu ding fimnak le zumhnak an ngeih khawh nakhnga lam hmuhsak ding le bawmh awk ah forh fialnak a tuah. Abiapi bik in mah ram ah umlo in ramleng chuah duhmi hna kong he pehtlai in, Nairobi ah tuahmi congress ah a chim. Chung Khar khuasak, lungrualnak le teimaknak, mipi caah teifirial in aa pe khomi hruaitu an um khawhnak hnga thazaang peknak a ngeih hna. Africa ram i Catholic fimcawnnak lei rianṭuantu hna nih mino hna kha cawisan lamṭha muhsak awk le ralṭha tein ruahchanank an ngeih khawh nakhnga bawmh dingin a forh hna i a hlei in lungdonghnak in ram chuahtak a duhmi hna nih mah le ramchung ah um duhnak le hmailei caah ruahchannak he mah le umnak cio sersiam awk ah fimthiamnak cawn awk ah a forh hna. A cakuat cu Cardinal Secretary of State Pietro Parolin nih min a thutmi cu December 4 in 7 tiang Nairobi ah tuahmi African Congress on Catholic Education caah Archbishop Gabriel Sayaogo sinah a kuat. “Catholic Fimcawnnak le African Konglam ah Ruahchannak, Hmelchunhnak, Ṭhanchoternak” timi tlangtar in tuahmi congress nih Khrih cungah hram aa bunhmi dirhmun tharchuah ṭhannak kha a biapi ah a chiah tiah a ti. Pope Francis nih biatak tein a rak dirpi mi “Global Compact on Education,” ṭhanchoternak caah a kal cuahmahmi rianṭuannak cungah Pope Leo nih lunglawmhnak a langhter.
Fimcawnnak “Lungthin tling a sertu asi”
Catholic fimcawnnak nih “a ṭhangchomi lungthin” lawng si loin midang cungah zaangfah zawnruahnak a ngeimi “lungthin tling” ngeih zong aa tinh. African Mino hna cu “Africa ram rumnak. Fimcawnnak lei rianṭuantu saya hna nih siangngakchia hna kha raṭhatnak le zumhngamhnak he lamhruai khawhnak lam ṭha an kawl a herh. Ram chungah zeihmanh ruahchannak a umlo ti ruangah lungdongmi mino tampi nih pumpak caah ṭihnung ngai in ramdang ah an kal dih tiah ralrin a pek hna. Cawnpiaktu saya hna nih, Africa nunphung le nuncan ziazaṭha ṭhawnnak ah hram aa bunhmi tinhmi nganpi chiah awkah le “zeihmanh kan sunglo” timi ruahnak le mah tein ṭhanchonak lam ser awk kha an chungah kirter ṭhan khawh nak hnga saya hna nih an bawmh awk hna asi tiah a ti.
Chungkhar kilvennak le hruaitu sernak
Chungkhar Jubilee he pehtlai in, Pope nih “chungkhar cu hmailei caah miphun sersiamnak hmun asi tiah a ti. Sertu Pathian nih a timhlamh i Bupi nih a ṭhanchotermi chungkhar cu kilven awk ah le ruahnak ṭhalo hna in kilven awk ah forhfialnak a tuah. African hruaitu tampi cu Catholic sianginn ah fimthiamnak a cawngmi an si nain hi ram nih hin harnak nganpi a ton rih. Ṭuanvo rian ṭha tein a la khotu le a ṭuan khotu ruaitu ṭha tampi mino tampi ngeih khawhnak caah saya hna le fimchimtu hna nih cawnpiak a herh. Lungrualnak le teimaknak lungput cu African phunglam ah hram aa bunhmi asi pin ah zapi caah ṭhatnak a chuahpi tu le Bupi rianṭuannak ah a biapi bikmi sining hna an si tiah a chim chap.
Thawngṭha chimnak rianṭuannak
“Fimcawnnak cu pawcawmnak rian lawng si loin thawngṭha chim a si,” tiah Pope nih a donghter. Africa mino pawl kha “daihnak sertu palai” a si khomi tiah a rak chimmi kha a nolh ṭhan i, fimcawnnak a cawngmi pa he nu he nan zapi tein na hmailei caan i an ram sersiamtu ah i tel cio ding in forhfialnak ca a kuat hna.