11 December- Thursday
Matt 11:11-15
Johan sinah Jesuh i Tehte khannak
Nihin thawngṭha ah Jesuh nih Tipil petu Mithiang Johan kha tling tein a thangṭhat. Johan Baptista sinah a ngan tukmi upatnak a pek caah hrinmi vialte nakin a ngan deuh tiah a ti. Asinain thangṭhatnak cu Jesuh nih amah kong a chimmi khuaruahhar biafang nih a zulh, “asinain Vancung Pennak chung i ahmebikmi cu amah nakin a ngan deuh” a ti. Zeicah cuticun a si? Hi thawngṭha caang kong he pehtlaiin William Barclay nih a chimmi ka rel tikah, Barclay nih aṭha bikmi fianternak pakhat a pek ti kha ka hmuh. Barclay nih Johan i a chambaunak cu Vailam cungah a langhtermi Jesuh i a kan dawtnak a hmuh lo kha a si tiah a kan chimh. Pathian i a thukmi a dawtnak tling cu Johan nih a ton bal lomi le a hngalh bal lomi thil a si tiah a chimchap. Hi zawn ahhin, kannih cu Johan nakin kan van aṭha deuh, zeicahtiah kanmah le ahmebik mi Khrihfa hmanh nih Jesuh Vailamtahnak kan ton i Pathian dawtnak kha thukpi in kan hngalh khawh. Hihi kan caah Pathian i a tlak lomi laksawng taktak cu a si.
Sihmanhsehlaw, Jesuh nih mithiang Johan nakin kan ṭha deuh a ti hrimhrim lo. A si amah nakin thluachuah kan hmu deuh men lai nain Pathian nih a langhtermi dawtnak kan sunsak lo ahcun cucu kan caah santlaihnak tlawmte lawng a si lai. Kan tukforhnak pakhat cu kan thluachuahnak hna he i nek cangmi ṭihnung a si ti kha na hngalh. Khuazakip ah a kal cangmi le zeizong vialte a hmu cangmi vawleicung khualtlawng bantukin, kan thluachuahnak kha santlai lo ah kan ruah i an rak i hngalh tuk caah hlan bantuk in an kan lawmhter kho ti lo. Kan thluachuahnak hna kha kan inek cang ti langhternak pakhat cu hi soiselnak le phunzainak lungput hi a si. Kan ngeihmi cungah Pathian sinah lawmhnak bia chim loin, cu kong cu kan phunzai i thil dang ngeih ka duh tiah kan chimh. Pathian nih kan halmi kha a kan pek taktak ahcun a donghnak ah mah kong he aa tlaiin kan phunzai lai ti kha kan zumh khawh. A thluachuah a nek cangmi cu a lung a tling kho bal lo.
Mithiang Johan nih kan khamhnak caah Pathian timhtuahnak ah rian a ngei i ralṭha ngaiin a tlinter. Jesuh ton awk le a nunchung ah a ton bal lomi Pathian he pehtlaihnak lam hmuhsak awkah kan lungthin kha a timhtuah. Tahchunhnak ah: lungthin thlennak, nunning thlennak, Pathian le minung hawi cungah lungput thlennak caah a kan auh.
Mithiang Johan zong nih bia in kan phuanmi kha tuahsernak ah hman dingin a kan auh. Amah caah cun sual phuannak ah kal i tlangbawi sinah kan sualnak phuan lawng hi a za lo; duhpatnak hna caah kan duh bikmi thlacamnak hna kan cam i cubantukin tipil kan ing caah Catholic Khrihfa kan si kan ti. Amah nih zaangfahnak tuah, rawl le hnipuan i hrawm, dinfelmi, zumhawk tlakmi le rawhralnak a ngei lomi siter a kan duh. Hihi Jesuh nih ahnuah a kan hal dingmi taktak cu a si.
Asinain Tipil petu Mithiang Johan kongah ka lung a ka sukmi cu a toidornak a si. Johan i a cawnpiaknak ngaih duh ah mipi nih an rat tikah, Messiah ka si tiah a ti khawh nain a chim lo. A kedan hri phoih awkah kaa tlak lo tiah a ti. Jesuh lam kha a timhtuah sawhsawh ko. Khamhtu a hmuh tikah, “Pathian Tuufa kha zohhmanh u” tiah a kut in a hmuhsak i a zultu hna kha a hnu a zulhter hna. Cu hna lakah pakhat cu Jesuh Lamkaltu pakhat ah a cangmi St. Andru a si.
Dawtmi ulenau hna, a donghnak ah Henri Frederic Amiel bia hi ruat hna u sih: “Toidornak taktak cu lungtlinnak a si” a ti.