9 December- Reflection
Matt 18:12-14
Tuu Tlau Bianabia
Dawtmi ulenau hna, Jesuh chimmi tuu tlau kong bianabia hi zeidah a sullam a si? Tuukhal pawl nih nitlak hnuah an tuu pawl kha an tling le tlinglo hngalhnak caah an rel dih tawn hna. Tuu hna cu an sining tein mi he i komh a thiammi an si caah, a dang tein a ummi tuu cu a rannak in a lung a buai kho i a lung a rawk kho. Tuukhal nih a tlaumi tuu kha a hmuh i tuurun ah a kirter ṭhan tikah a ngaihchiatnak le a lungretheihnak cu lawmhnak ah aa thleng.
Phundang in chim ahcun, Jesuh nih abikin Pathian nih sualnak ruangah a tlaumi minung kawlnak ah a ngol lai lo ti kha a kan chimh duh. Pathian nih zei ruang hmanh ah ahohmanh a hlaw bal hna lo. A kal zungzal i a tlaumi kha a lak ṭhan. Misual kanmah kawlnak ah aa din bal lo. Misual kan sinak hmuh awk le tuurun ah kirter ṭhan awkah miṭha sawmkua le pakua kaltak tiangin a kan dawt tuk caah a kan kawl zungzal. A ngaingai ti ahcun Pathian nih ahohmanh a hlawtbal hna lo zeicahtiah ahcun, kan dihlak in Amah sinin kan pial cang caah a si. Salm 14 bia cherhchannak in, Mithiang Paul nih hitin a kan ti: “Mi vialte cu lam an pial dih, aa khatmi vialte cu santlai lo an si,” (Rom 3:12).
Asinain kan lak i pakhat nih a vakvai asiloah tuurun a kaltak tikah ahodah mawhchiat awk a si lai? A ngaingai ti ahcun kanmah i zalonnak le duhnak kan ngei i Khrihfabu ah um peng ding maw asiloah amah he i hlat ding timi thimnak kan ngei. Sualphawtnak cu pumpak cung lawng ah chiah a si lo ti kha na hngalh ko nain sualphawtnak cu Khrihfabu cungah chiah khawh a si i kannih cu Khrihfabu kan si. Kannih, sawmkua le pakua a tangmi Khrihfabu cu, a fale taktak bantukin kan nung lo. Midang kha lam pialter le thihter kan sianh hna nain Khrihfabu chungtel lakah a buaibai bikmi le huham a ngei lomi cu Pathian mithmuh ahcun aa tlakmi a si.
Midang nih Khrihfabu an vakvaihnak le an chuahtaknak a ruang dang pakhat cu kanmah nih kan ukmi le kan i porhlawtmi ziaza, lungput le lungfahnak bia hna ruangah a si kho. Cucaah hi bianabia hi Tuukhal a simi Pathian kong lawng si loin, kanmah pakhat cio nih tuurun le Khrihfabu a chuahtak tertu kong zong a sive. Asiahcun atu zeidah kan tuah lai ulenau hna?
Zeidah kan tuah lai timi cu hi Advent caan chung ahhin Bawipa ratnak hngah le timhtuah ding hi a si. Asinain Bawipa ratnak caah zeitindah fek tein kan i timhtuah? Pum aa pemi Khrihfa si hna u sih. Zeicatiah Khrih sinah pum ipek cu a nuammi thil a silo nain lawmhnak taktak a chuahtertu a si caah a si. Tahchunhnak ah, George Gallup nih report a tuah. American mi zatuak pahra nak tlawm deuh cu Khrihfa ah fek tein aa pumpemi an si tiah a thanh. Hi aa pumpemi Khrihfa hna hi mipi dang nakin an i lawm deuh tuk. Khrihfa aa pemi hna cu American mi sawhsawh nakin midang kha an cohlan deuh hna; zaangfahnak rianṭuannak ah an i tel deuh i thlacamnak ah an i pekchanh taktak. Hi zatuak pahra nak tamdeuh American hna nih Khrihfa kan si tiah an i ti ko nain, a tamdeuh nih cun Khrihfa zumhnak kong tlawmte lawng an hngal i Khrihfa a si lomi hna he aa dang lo. A dihlak in zoh tikah, hi ram ah Sunday school le biaknak lei cawnnak phunglam hi a ṭha lo a ti.
A donghnak ah Billy Graham bia hi ruat hna u sih. A chimmi cu, “Rumnak a tlau tikah zeihmanh a tlau lo, ngandamnak a tlau tikah thil pakhatkhat a tlau, ziaza a tlau tikah zeizong vialte a tlau” tiah a ti.