Nu Mary Sualhram Ngei Loin A Semnak
Immaculate Conception of BVM
Audio (aw) zong in ngai khawh a si. 👇👇
Minung chungah aa neh mi sualhrampi in luatter dingin vawlei cungah a ra hnga mi Jesuh Khrih i khamhnak rian ah i tel ve dingah zungzal nungmi Pathian sinin a hleikhun thluachuah pakhatte thawngin a thianghlim mi ngaknu thiang Mary cu; sualhram ngei loin a rak sem ti kha Bupi nih a cohlan. Hi cawnpiaknak cu Bible le Bupi nunphung tuanbia cungah hrambunh mi a si tiah Pope Pius IX nih cafang hmanh in langhter khawh lo tiangin a thiangtuk mi Pathian (The Bull Ineffabilis Deus) tiah 1854 kum, December (8) ah phung ningin a fehter i a thanh. Nungak thiang Mary le Satan karlak i rem lo nak kong kha “Nangmah le nu cu nan i hua lai, a tefa le na tefa cu ral an si lai, mi nih na lu kha rial an i zuam lai i nang nih an kedil kha cuk naa zuam ve lai” tiah (Gen 3:15) ah a hlanpi tein biathlam pekmi a rak um. Cu biathlam cu Vancungmi nih Mary sinah thawng a thanhnak (Lk 1:28) ah kan hmuh. Vancungmi kha a sinah cun a ra i, “Na cungah daihnak um ko seh. Bawipa cu na sinah a um i thluachuahnak tampi in an pek lai” tiah fek tein a dirkamh. Elizabeth nih Nu Mary a biakchawnhnak (Lk 1:42) ah “Nangmah cu nu vialte lakah thluachuak bik nu na si” a timi nih hin a fehter áąhan rih. Chan laifang ah Nu Mary sualhram ngei loin a semnak biathuk hi Bible lei thiamsang hna karlak ah i al-awk bia pakhat in a rak um. Bernard le Aquinas bantuk minthang ngaimi a dang biaknak lei thiamsang hna le St. Dominic Zateik phu nih Nu Mary cu sualhram he a rak i sem tiah an rak ruah. Anmah ruahdamhnak he ralchanh in Duns Scoto bantuk St. Francis Zateik bu tu nihcun Khrih Jesuh a nu Mary cu sualnak a pelte hmanh a ngei kho lo tiah an rak ruahdamh. 1854 kum ah Pope Pius (9) nak nih mah bia-alnak he pehtlai in “vawlei cung pumpi he pehtlai mi Jesuh khamhnak rian ah aa tel ve mi Nu Mary a semnak cu Pathian nu sinak in aa tel mi a si caah sualhram ngei loin a semmi a si” tiah a thanh hnu lawngah bia-alnak cu a dong. Hi cawnpiaknak he pehtlai mi sullam khiahnak kha 1858 kum, Laurdes i langhnak a rak tuah mi Nu Mary biathlam in hmuh mi a si. Cu hmuhsaknak a rak hmuh mi Bernedette nih nu kha a min a vun hal tikah nu nih “Keimah cu Sualhram ngei loin a semmi nu ka si” tiah a rak leh.