MINUNG SUALNAK (Gen 3:1-13)

Bawipa Pathian nih a ser mi dum chung ahcun Adam le Eve cu nuam ngai in an rak um. Ni khat cu Rul kha a rak i, Eve amah lawng tein a um lio ah khan, “Eve! Dum chung i a ummi thingthei hi a zeihmanh nan ei lai lo tiah” Pathian nih an ti hna maw? tiah a hal. Eve nih cun dum laifang i a ummi thingthei dah ti lo cu a zeipaoh kan ei khawh ko hna, Pathian dum laifang i a ummi thingthei kha cu nan ei lai lo, a tongh zong nan tong lai lo. Nan tongh ahcun nan thi lai tiah a kan ti tiah a leh.

            Rul nih cun cucu a hmaan lo, nan thi lai lo. Pathian nih khi thingthei nan ei ahcun amah Pathian bantuk in hngalhnak nan ngei ve lai i, a ṭha le ṭha lo nan hngalh ve lai a ti. Cu Eve nih thingkung cu a zohi mitlang ngai a si le a thei cu mitthi ngai a si cu a hmuh.

 A fimmi si cu zeitluk in dah a nuamh hnga ti kha a ruat i thei kha a lawh a ei. Cun a va zong kha a pek ve. Cun a va nih a ei ve. An ei dih cangka in hngalhnak kha an vun hmuh. Tak lawng an si kha an i hngalh. Cu caah theipi hnah kha an i thit i an i hruk.

            Cu ni zanlei sang ahcun Pathian cu dum chung i a chawh kha an theih i thinglak ah khan it hup. Bawipa Pathian nih cun Adam! Adam! khua zei ah dah na um a ti. Adam nih cun taklawng ka si caah ka thin a phang i kaa thup tiah a leh. Aho nih dah taklawng na si cu an chimh. Ei hlah tiah kan timi thei kha na ei dara tiah a ti. Adam nih na ka ser piakmi minu nih khan a ka pek i ka ei tiah a leh.

            Pathian nih minu cu zeicahdah hihi na tuah tiah a ti. Eve nih cun Rul nih a ka hlen i a ka ei ter tiah a leh. Cun Pathian nih Adam le Eve cu saphaw hnipuan a ser piak hna i a aihter hna. Cun Eden dum in vawlei ah a ṭhawl hna. Cun Vancung mi Cherub kha dum cu kaphnih har vainam in a conghter hna.