St. Ambrose (340-397)

Bishop le Bible Thiamsang

Audio (aw) zong in ngai khawh a si. 👇👇

Milan kha a kilvengtu (Patron of Milan) St. Ambrose cu AD 340, Germany ram, Treir khua ah a chuak. A pa a thih hnu ah Rome ah fimnak a cawn peh i a hnu ah Milan khuauk rian a ṭuan. AD 373 kum tiang lawki a si rih mi Ambrose kha mipi nih an hnekchih tuk ruangah Milan Bishop ah an rak thim. Cu hnu, hmakhatte ah tipil a ing i Bishop cannak a lak colh. Cu hnu thawkin a ngeih mi thilri chawva vialte kha mi sifak hna a pekṭhan hna i a pum, a lungthin vialte zong mi zapi caah tiin aa zuam i aa pekchanh. A nunnak lamthluan ah dinfelnak in aa zuam i a ṭuan. A caan tampi hna kha Bible relnak le phungchim cawnpiaknak ah a hman dih. Milan uk chung hmunpi Biakinn i St. Ambrose phungchimnak ruangah St. Augustine zong a nunnak aa thleng ve.

Parihdewa rili chung i harnak an ton lioah Ambrose cu Bupi nih a ngeih mi tilawng kha a zuar i cu tangka cun thongtla mi le sifak harsa mi hna kha a rak bawmh hna. “Biana ah Bupi cu sui a ngeih a si ahcun, cu sui cu bawmhnak a herh mi hna caah hman ding a si, chiah sawhsawh awk a si lo” tiah Ambrose nih Bupi kha a soisel i ruahnak a pek hna. Pathian caah atu le atu thianhlim zuamnak rian kha a thangṭhat i amah lam hmuhsaknak tangah ngaknu thiang tampi kha a sangbik ah a chiahter khawh hna. Cuti a tuahnak ruangah cheukhat nih peng chungah milu a zorter tiah sual an phawt tikah, “minung cihram a hrawktu cu nungak thiang hna hi an si lo, ral dohnak lawng hi a si” tiah a leh hna. Ambrose cu kum 57 a ti ah Pathian ṭang chungah i hngilh in aa din. A ruak kha rampi vuinak phungin Milan Biakinn ah an vui.