2nd SUNDAY OF ADVENT (KUM A)

Is 11:1-10; Rom 15:4-9; Matt 3:1-12

Puai nganpipi an naih tikah, mi nih thil tampi le zeitindah timhtuahnak kan ngeih lai timi kongah an lungre a thei, cu hna lakah zeidah an i hruk lai timi kong zong aa tel.

Mi tampi cu Christmas ca timhtuahnak ah kan i hngatchan cang. Mi tampi nih an Christmas card an kuat cang i Christmas ca thil cawk ding cu an i timh cang. Midang cu zei laksawng dah pek ding timi biakhiahnak ah an i hngatchan i ngakchia hna cu an nu le pa sinin zeidah hmuh an duh timi biakhiahnak ah an buai. Ni nganpi kan i ruahchan lioah mi tampi nih lungthawhnak kan ngei.

Buainak cu, a langhning ahcun, kan chanthar zatlang nun nih Christmas cu chawlehnak ah a hman caah changreu cung i a tuammi ice-cream hna kha kan palh, thilri chungin a chuakmi accident (thil poipang) hna kha kan palh. Voikhat cu mi pakhat nih khuaruahhar ruahnak a rak chuahpi: “Christmas cu hloh awk a si, zeicahtiah sifakmi hna kha a tuarter deuh hna. Hi caan nih hin thil a cawk khomi le zeihmanh a ngei lomi hna karlak i aa dannak kha a langhter” a ti.

Zeiti a si hmanhah, kannih cu puritanical (ziaza ṭha rumro a uarmi) zong kan si awk a silo, sihmanhsehlaw, lenglei thilthuam hna kha hlawt awk a si: thilthuam, laksawng, rawl le dinmi hna tibantuk kan hloh hna ahcun, Christmas pawngkam thinlungput cu a tlau lai. Asinain a hmaanmi hmuhning tlau khawhnak ṭihnung a um zungzal ti kha i hngal zungzal hna u sih. Cucaah, ‘Christmas ah Khrih kha zohkhneh ding’ tiah kanmah le kanmah kan i cinken peng a hau.  

Adang biatak pakhat cu Christmas hi biaknak he aa pehtlaimi puai a si. Kum zabu tampi a liam cangmi ah a rak rung ṭummi kan Khamhtu a chuahnak puai kan tuah. Cucu ruat hmanh! A chuahnak caah kan dihlak in kan i lawmhpi mi Ngakchia cu mi lakah a niambik, sifak le mi sawhsawh in a ra. Amah nih a tleumi le a hlunghlaimi kan puai hna kha a tuah kho bal lai lo! Hi kongah, timhtuahnak a tam tukmi ah, kanmah leiin chunglei timhtuahnak kha kan philh. Tutan Christmas ah kan thluachuahnak cheukhat hrawmh awkah timhcia tein um hna u sih, cu nih cun kan unau hna an harsatnak kha a lawmhter lai i zeitindah a si zongah a zorter lai.

Cucaah, nihin thawngṭha ah, thlarau taktak in timhtuahnak ngeih dingin a kan fial, cucu, tipil petu Johan nih dawh tein a thanhmi chunglei in a si: “Nan nunnak kha remh u, Pathian Pennak cu a nai cang.” Christmas hla Joy To The World nih dawh tein a chim: “Lungthin kip nih Amah caah hmunhma timhtuah hna seh.”

Cucu thil lianngan a si, Pathian Pennak a rat lainak a si. A ngaingai ti ahcun, vawlei tuanbia ah a cangmi thil nganpi a si. Asinain Johan cu a thilthuam kong le zeidah ka ei lai ti le Judah mi hruaitu hna nih an uarnak kong hmanh ah a lungre a thei lo. John cu zeihmanh a lungre a thei lo. Bawipa ratnak caah aa timhtuah sawhsawh. Cun Pathian lamkaltu a si bantukin, midang zong timhcia tein um ve dingin ralrinnak a pek hna. Pathian Fapa minung tuanbia ah a lutlainak caah timhtuahnak ngeih cu, zan ihnak pupuan tawhrolh le angki hruk asiloah aircon khaan asiloah ihkhun ah ihnak in si loin, naupuan in tuamnak le caw rawl einak kuang chungah i hngilh kha a si.

Advent cu timhtuahnak caan a si. Piantharnak le sual ngaihchihnak caan a si; “Pathian Pennak cu a nai cang” tiah Johan nih a thanhmi thawngthanhnak ningin nun awk caan a si. Pennak cu ruahlo piin a hung chuak lo. Cucu amah tein a ra lai lo. Pathian nih minung hmangin hi thil hi a hngalhter lai. Mah cu thil sining cheukhat a tlin tik lawngah a ra lai – cuka ahcun mi hna cu pumpak asiloah zatlang nun ah dinlonak hloh awkah anmah le anmah i pekchanh an duhnak le pakhat le pakhat dirkamh awkah timhcia an sinak nunning thar ah an i thleng lai. Hi ahhin, Pennak cu a nai cang. Asinain a tak in a cang taktak lai maw ti cu kanmah pakhat cio cungah aa hngat.

Ngaihchihnak le thlennak cu advent chung lawngah a cang lai lo, zungzal in a si awk a si nain zeitin lam in dah? Kan sualnak caah ngaihthiam kan halnak thawngin a si. Sualnak cu pum chungah a ummi sivai bantuk a si i duhsah tein a thah. Ngaihchihnak cu kan thlarau thianhnak lam a si. Mi tampi nih sualnak kan khawmh i kan theih hlanah, kan thlarau cu hnawm thilri he a khatmi inn bantukin a hnok cencun. Pathian ratnak caah timhtuahnak ngeih awkah inn thianhnak tlawmpal kan tuah a hau. Sualnak hloh in Amah caah hmunhma kan serpiak a hau. Sualphuannak Sacrament cu bawmtu taktak a si.

Kannih nih Khrih kawl lawng si loin caan donghnak ah a rat lainak zong kan i ruahchan. Kan chungah a umpeng caah kan i lawmtuk, asinain aa ngaichihmi le a thiangmi lungthin-aa thlengmi lungthin lawngah a lut kho. Calcutta khuami Mother Theresa nih a rak chim bantukin: “Nan lungthin kha thlen u…kan lungthin kan thlen lo ahcun kan i thleng lo” kan si.

Remhnak! I ngaichih! Nan nunnak kha remh tuah u! Cun sualnak in i mer u. ‘Kan ngaithiam’ ti law cuhecun kal. Tuah! Cun atuah tuah! Thaizing cu a tlaituk kho men! Pathian Pennak cu a nai cang caah atu cu cohlan awk tlak caan a si! Amen.