4 December – Thursday

📖 Matt 7:21, 24-27 📖

Zultu taktak

Hi Latin metaphysical axiom “agere sequitor esse” (asiloah ‘Action follows being-Tuahsernak nih sinak a zulh’) hi na hngalh maw ti ka hngal lo. A sullam cu pakhat nih a sining ningin a tuah a hau tinak a si. Minung nih cun fimkhur tein le ṭuanvo ngei tein minung sining in a cawlcangh a hau. Cubantuk cun, Judah biafang, halakah (mi pakhat i lam “kilning”) nih haggadah (cawnpiaknak) kha a zulh a hau.

Nihin thawngṭha cacang ah Jesuh nih innsaktu pahnih kong a kan chim. Pakhat nih lungpi cungah a inn a sak i a dang pakhat nih thetse cungah a inn a sak a ti. Lungpi cungah inn a sami kha Jesuh nih a thangṭhat. Cun hi lungpi hi zeidah a si? Lungpi cu amah le a cawnpiaknak, a bia, a nunnak le a zohchunhmi hna an si ko. Asinain a bia ngaih asiloah rel sawhsawh lawngin a za lo, a herhmi cu relnak he aa tluk tein abiapi mi cu tuahsernak a si. Hi thawngṭha catlang hramthawknak ah Jesuh nih hitin a ti: “Bawipa, Bawipa, tiah a ka timi paoh nih Vancung Pennak chungah an lut lai lo, vancung khua i a ummi ka Pa duhnak a tuahmi lawnglawng nih an lut lai,” (v. 21). Hi Jesuh chimmi bia ah hin, pennak chung luh khawhnak cu Pa duhnak a tuahmi hna ca lawngah a si tiah a kan chimhmi a si lai tiah zumh a si. Biaceihnak Ni ah ziaza rawhralmi profet le khuaruahhar thil a tuahtu hna cu Jesuh nih a hlawt hna lai.

Dawtmi hawidawt hna, hi Jesuh cawnpiakmi hi zeitindah kan zulh? Nan sinah ka hrawmh hna laimi nih hin, theih lomi caṭialtu sinin a rami Jesuh Bia kha tuahsernak ah hman khawhnak dingah a kan bawmh lai ti ka zumh. Hi tikah kan kaa hun lo dingin ruahnak a kan cheuh:

Thinhunnak chungah – Phungthlukbia 14:17

A konglam vialte na hngalh lo tikah – Phungthlukbia 18:13

Tuanbia kha na fehter rih lo tikah – Deuteronomi 17:6

Na bia nih a derthawm deuhmi a lung a fahter ahcun – 1 Korin 8:11

Ngaih caan a phak tikah – Phungthlukbia 13:1

Thil thianghlim kha ceunak ah ser awkah tukforh na si tikah – Phungchimtu 5:2

Sualnak kong he pehtlaiin capo chim na si tikah – Phungthlukbia 14:9

Ahnu ah na bia na ningzak ahcun – Phungthlukbia 8:8

Na bia nih a palhmi ruahnak a chuahter ahcun – Phungthlukbia 17:27

Buainak cu nangmah he aa pehtlaimi a silo ahcun – Phungthlukbia 14:10

Lih chim awkah tukforh na si tikah – Phungthlukbia 4:24

Na bia nih midang min a chiatter ahcun – Phungthlukbia 16:27

Na bia nih hawikomhnak a hrawh ahcun – Phungthlukbia 16:28

Soiselnak na ngeih tikah – Jeim 3:9

Au loin na chim khawh lo ahcun – Phungthlukbia 25:28

Na bia nih Bawipa asiloah na hawikom le na chungkhar kha a langhter lo ahcun – Peter 2:21-23

Ahnu ah na bia hna ei na hau ahcun – Phungthlukbia 18:21

Voikhat nakin tam na chim cang ahcun – Phungthlukbia 19:13

Miṭhalo pakhat thangṭhat awkah tukforh na si tikah – Phungthlukbia 24:24

Cu nakin rian na ṭuan awk a si tikah – Phungthlukbia 14:23

Hawidawt hna, a cunglei ruahnak cheuhnak hna nih Christmas timhtuahnak ah him tein lam kan hruai ko seh. Amen!