3 December – Reflection
Thawngṭha : Matt 15:29-37
Mi tampi damternak
Dawtmi ulenau hna, rawl hi abiapituk, zeicatiah rawl lo cun kan thi. Pathian nih nunnak pehzulh khawhnak dingah rawl ei a herhmi organic in a kan ser. Cucaah a sermi thil cheukhat cu nifatin kan nunnak caah kan herhmi rawl a si. Asinain zeicahdah rawlṭam ruangah nifatin a thimi an um? Tahchunhnak ah, hi U.S. News and World Report nih a luan ciami October 21, 1991 ah rawl a ṭam pengmi hna an um tiah a ti: Ethiopia-20%, Sudan-20%, Mozambique- 30-40% le atu lio rawl ei aa summi American upa hna cu 19% an si. Biahalnak a phi cu hakkauhnak ruangah a si. Vawleipi nih hin minung paohpaoh ei awk tluk rawl a chuah khawh tiah U.N. Report nih a chim. Asinain rawl a chuahtu hna cu nihin thawngṭha chung i Jesuh bantuk si loin, an hakkauhtuk caah sifakmi hna sinah an i hrawm kho lo. Jesuh i a lungthin cu zaangfahnak nih a hnuh caah, mipi kha a thlah hna hlanah thilri rawl in a cawm hna.
Duhfahnak cu, Sir Fred Catherwood, (Evangelicals Now September, 1994) nih a chimning ahcun, “thih hnu nunnak a um ti lo timi zumhnak nih a chuahpimi a si. Kan si khawh chungin kan tlaih khawh chungin kan tlaih i fakpi in kan tlaih” a ti.
America ram i saram zohkhenhnak hmun caah Africa ram i saram a tlaihmi pa pawl nih tlaih ahar bikmi saram pakhat cu ring-tailed monkey a si tiah an ti. Sihmanhsehlaw, cu ramthen cung i Zulus miphun caah cun a sawhsawh te a si. Hi a rangmi saram hmete hi kum tampi chung fawi tein an tlaih cang. Zulu pawl nih an hmanmi lam cu saram kong hngalhnak cungah hram aa bunh. An rap cu mitsur ruangah a ṭhangmi melon lawnglawng a si. Hi melon thlaici cu zawng nih an duh bikmi a si. Mah kha an hngalh caah, Zulu pawl nih melon chungah kua pakhat an vih sawhsawh, cu kua cu zawng nih a kut a khumh khawhnak ding caah a za bakmi a si i a chung i a ummi thlaici pawl kha a phak khawh. Zawng nih a kut a khumh lai, a si khawh chungin thlaici a lak lai, cun a chuah hram aa thawk lai. Nain a chuah kho lo. A kut cu atu ah a awngmi nakin a ngan deuh cang caah a si. Zawng nih suimilam tampi chung melon cu a hnuh lai i aw thia ngaiin a au lai i a doh lai. Asinain thlaici a hlawt lo ahcun hlennak chungin a luat kho lai lo, cucu tuah a duh lo. Culio ah, Zulu pawl nih an rak luhhnawh i an tlaih.
Dawtmi ulenau hna, Advent cu Bawipa ratnak caah timhtuah caan a si i zumhnak mit le dawtnak lungthin he nifatin tuah khawh a si. Zeicahdah nifatin ihkhun in kan thawh i kan tho peng rih ti kha kan khuaruah a har maw? Kan unau tampi nih an cabuai cungah chiah ding rawl hmanh an ngeih lo lio ah kan cabuai cungah rawl a um pengmi hi kan khuaruah a har lo maw? A donghnak ah Fr. Jerry Orbos, SVD nih a chimmi bia hna hi ruat hna u sih. “Thluachuah kan hmuh khawhnak hnga zaangfahnak (siannak) ngeih kan cawn a hau, Pathian sin kal le Amah kha tuahkhawhnak khonh pek kan cawn a hau. A si, hrawm kan thiam a hau. Kan karh khawh hlanah tlawmter hmasa kan cawn a hau” a ti.