2 December – Reflection

Bible: Is.11:1-10; Luke 10:21-24

Pa thangṭhatnak

Leo Buscaglia nih a cauk, Living, Loving @ Learning (p. 73) le 365 Days with the Lord nih a lakmi ah hitin a chim: “Aṭha tukmi min a ngeimi hna cungah kan lung a tling tuk. M.D. asiloah Ph.D. nih mifim a siter taktak tiah kan zumh. Nan caah thawngpang ka ngei! Mihrutbik PhD mi cheukhat cu ka hngalh hna. Ka theihmi hna nih Ph.D timi cu zeidah a si ti hmanh an hngal lo!”

Nihin thawngṭha relnak ah Jesuh bia hi a buaibai ngai. Amah nih hitin a ti: “Ka Pa, nangmah cu kan thangṭhat…zeicahtiah hi thil hna hi mifim le a thiammi hna sinin na thuh hna nain ngakchia bantuk hna sinah na langhter hna.” A fiangmi cu hi biafang hna hi biafang taktak in kan lak awk a si lo. Jesuh nih a chim duhmi cu a lungthin aa kau i aa toidormi asiloah ngakchia bantukin a sawhsawh tein a ummi hna sinah aa phuang i aa porhlawmi le aa ruamkaimi hna sinah aa phuang lo.

Ngakchia bantukin a sawhsawh tein um ticu Pathian cu Pa bantukin zeitindah i bochan ding a si ti kha a hngalh i cucu nihin ah kan herhmi a si. Mrs. Imogene Frost sianginn i kum 10 ngakchia Sunday School Class hna i an phunzainak ruangah “Upa pawl cu zeidah an palh?” timi an hmuhning ah ka rel, An phunzainak hna cu:

1. Upahna nih biakamnak an tuah, cun an philh dih asiloah biakamnak taktak a si lo, a si khomi men a si tiah an ti.
2. Upa pawl nih ngakchia kha tuah dingin an chimh tawnmi thil hna kha an tuah lo, cu hna cu an thilri lak asiloah thianghlim tein um asiloah biatak chim zungzal tibantuk an si.
3. Upa pawl nih ngakchia nih an chimmi kha an ngai bal lo. Zeidah an leh lai ti kha a hlankan in biakhiahnak an tuah zungzal.
4. Upa pawl nih palhnak an tuah, asinain an cohlang ballo. Annih cu palhnak zeihmanh an tuah ballo asiloah midang nih an tuahmi a si tiah an i hlen zungzal.
5. Upa pawl nih ngakchia hna bia an kham hna i zeihmanhah an ruat hna lo. Ngakchia nih upa pakhat bia a kham ahcun, chimhhrinnak asiloah achia deuhmi thil pakhatkhat a hmuh.
6. Ngakchia nih thil pakhatkhat, rong pakhatkhat asiloah muisam pakhatkhat asiloah a ngan le a hmete zeitluk indah an duh ti kha upa nih an hngal bal lo. An uar lomi thil a si ahcun, ngakchia nih anmah tangka an hman ko zongah, “Cu thil hlun he zeidah na duh ti cu ka ruat kho lo!” tiah an ti zungzal.
7. A caan ah upa hna nih ngakchia pawl kha ningcang loin dantatnak an pek hna. Thil hmete palhnak pakhatkhat na tuah i upa nih na caah sullam a ngei lomi thil pakhatkhat an in chuh ahcun ahmaan lo. Caan dang ahcun thil ṭha lo taktak na tuah sual i dantatnak kan in pek lai an in ti, asinain an tuah lo. Na hngal bal lo i  na hngalh awk hrimhrim a si.
8. Upa pawl nih kum 10 an si lio ah an rak tuahmi le an rak hngalhmi kong kha an chim zungzal nain atuah kum 10 si cu zeidah a lawh timi ruah an i zuam bal lo. (From: J.A. Petersen, ed., For Families Only, Tyndale, 1977, cahmai 253)

Asinain abiapi deuhmi cu Khrih bantuk kan si a hau. Theih lomi caṭialtu pakhat nih hitin a chim: “Missionary Adoniram Judson nupi nih thawngzamhca capar pakhat nih lamkaltu cheukhat he an in tahchunh tiah a chimh tikah, Judson nih, ‘Paul bantuk si ka duh lo…asiloah mi sawhsawh bantuk si ka duh lo. Khrih bantuk si ka duh…Amah lawng zulh ka duh, a cawnpiaknak i zohchunh, a Thlarau ah din, cun a kedan ah ka ke chiah ka duh…Oh, Khrih bantuk deuh si ka duh!’” tiah a leh.