PATHIAN THUMKAWMH IN AA PHUANNAK
Fapa nih a phuanmi Pa
Biaknak tampi nih Pathian kha “Pa” tiah an auh. Pathian cu Pathain hna le minung hna i Pa, tiah an ruah cio. Isreal miphun hna nih Pathian kha Vawlei sertu a si caah “Pa” tiah an auh. (Cf. Deut 32:6, Mal 2:10). Cu lawng a si lo, Pathian cu “Pa” tiah an auhnak sullam a um rih. Zeicahtiah Israel miphun hna sinah biakamnak le nawlbia laksawng kha a pek i “Father” ah a chiah. (Ex 4:22). Pathian cu Isreal siangpahrang hna i “Pa” ti zongin auh a si. A bikin amah cu “Sifakmi hna i “Pa” amah hupphenhnak tangah a ummi ngakṭh le nuhmei hna i Pa, a si. (Cf. 2Sam 7:14, Ps 68:6).
Pathian kha “Pa” tiah auhnak in zumhnak aw nih thil pahnih kha a kan chimh. Pathian cu zeizong vialte thawhkehnak le nawl a ngei dihtu a si ti le, amah cu a fale vialte cungah dawtnak, ṭhatnak le siaherhnak a ngeitu a si, ti hna kha an si. Pathian a nunnemnak le a ṭhatnak hi nu sinak muisam in langhter khawh a si. (Cf. Is 66:13, Ps 131:2).
Sihmanhsehlaw minung nu le pa sinak hi a palhthiam i, nu sinak le pa sinak muisam kha a hrawh ṭheo. Cucaah Pathian cu nu sinak le pa sinak nakin a sang deuh ti kha kan ruah awk a si. Pathian cu nu zong a si lo, pa zong a silo, amah cu Pathian a si. Amah cu a thawhkehnak le zohchunh awk a sinak in minung nu sinak le pa sinak nakin a sang deuh i a lawnh dih. (Cf. Ps 27:10), Eph 3:14, Is 49:15). Ahohmanh Pathian Pa a si bangin pa an si lo.
Jesuh nih Pathian cu Pa a si, ti kha theih bal lo phung in a phuan. Amah sertu a si caah Pa a si ti lawng si loin Fapa a ngeih caah zungzal in Pa a si cang. Pa dah ti lo cu ahohmanh nih Fapa kha an hngal lo. Fapa le Fapa nih a phuanmi hna dah ti lo cu ahohmanh nih Pa kha an hngal lo,” tiah a ti. (Mt. 11:27).
Cu a si caah Lamkaltu hna nih Jesuh cu BIA, an ti. “A hramthawk ah BIA a um; BIA cu Pathian he a um i BIA cu Pathian a si”. “Hmuhkhawhlo mi Pathian muisam a si”. “Pathian sunparnak, a ceunak le Pathian taktak he aa lo mi,” tiah an ti. (Jn 1:1, Col 1:15, Heb 1:3).
Lamkaltu hna cawnpiaknak kha zulh in Bupi nih Nicea Council (325 A.D) ah Fapa cu Pa he cannak aa khat a ti. Nicea zumhnak bia ah “Pathian Fapa ngeihchunh, zungzal hmunmi Pa in hrinmi, ceunak in ceunak, Pathian taktak in Pathian taktak, sermi si loin hrinmi a si, Pa he sinak an i khat,” tiah a ti.