PATHIAN NIH AMIN A PHUANNAK
Pathian nih a mi Israel sinah amin kha a hngalhter hna. Amin auhnak in amah he i naihchin hna seh ti kha a duh.
Pathian nih a miphun Israel sinah duhsah tein min dangdang in aa phuang. Sihmanhsehlaw Moses sinah aa phuanmi min hi Biakam Hlun le Biakam Thar an pahnih caah a `ha bikmi min a si.
Pathian nih khang loin a alh hluahmahmi burbuk in Moses kha a auh: “Keimah cu na pa a Pathian, Abraham Pathian, Isaac Pathian le Jacob Pathian ka si,” a ti. (Ex 3:6). Moses nih Pathian kha a thawh i “Keimah cu Israel mi hna sinah ka phan i nan pupa hna Pathian nih nan sinah a ka thlah, ka ti hna lai i annih nih, “Amin cu ahodah a si tiah an ka hal ah cun zeitindah ka chimh hna lai,? tiah a ti. Pathian nih Moses kha, “KEIMAH CU KEIMAH A SIMI KA SI,” tiah a ti. Cun Israel mi hna kha hi tin chim hna. “KEIMAH KA SI” a timi nih nan sinah a ka thlah. Mah hi zungzal ka min a si i cuticun techin fapar nih Keimah kha an ka hngalh camcin lai. (Ex 3:13-15).
“KEIMAH CU KEIMAH A SI MI KA SI”. Cun cu YAWHE ‘YHWH’ timi kha a si. Pathian cu biathuk a si bangin mah min zong hi khuaruahhar biathuk a si ve. Mah hi min phuan zong a si i min chim duh lo zong a si. Mah nih hin Pathian a sining kha a `ha deuh in a kan chimh. Kan theihthiamnak le kan chimthiamnak cungah a ummi a si. Amah cu “aa thupmi Pathian a si” amin cu chimthiam ding a si lo i amah cu minung he naih a duhmi Pathian a si. (Cf. Is 45:15, Biaceih 13:18).
A min a phuannak in Pathian nih zungzal in zungzal tiang a hmunmi a sinak kha a phuan chin. “Nan pupa hna Pathian ka si,” a ti tikah a liamcia mi caah a si. “Nan mah he ka um lai a ti tikah hmailei ca kha a chim. (Ex 3:6, 12). A min kha, KEIMAH KA SI” tiin a phuan bangin Pathian cu a miphun khamh awk caah a zungzal in a umpi hna mi Pathian a si.
Pathian i duh awktlak le khuaruahhar in a umnak hmaiah minung nih zeihmanh a si lo kha aa hmuh. A alhhluahmahmi burbuk hmaiah Moses cu a kedan aa phawih i Pathian a thiannak hmaika ah a hmai kha aa huh. (Cf. Ex 3:5-6). A thiangmi Pathian sunparnak hmai ah Isaiah cu a au; “Elaw, mah hi ka si ko cang! Ka lo ko cang! (Is 6:5). Jesuh nih a tuahmi khuaruahharnak hmaiah Peter cu a au ve, “Ka sinin chuak ko, zeica tiah keimah cu misual ka si, Maw, Bawipa,” a ti. (Lk 5:8). Sihmanhsehlaw Pathian cu a thiangmi a si caah misual ka si tiah aa hngalmi hna kha a ngaihthiam khawh hna.
“Keimah nih `ih a nungmi ka thinhunnak kha ka hmgan lai lo…zeicahtiah keimah cu Pathian ka si…minung ka si lo, nan lakah a thiangmi ka si,” tiah a ti. (Hos 11:9). Lamkaltu Johan zong nih sual a kan phawt tik paoh ah a hmaiah kan lungthin kha kan fehter `han khawh, zeicahtiah Pathian cu kan lungthin nakin a ngan deuh i zeizong vialte kha a hngalh dih” (Jn 3:19-20). Pathian a thiannak kha `ihzah in Israel mi nih amin kha an chim ngam lo. Bible cathiang an rel tikah (YAHWEH (YHWH) can ah “Bawipa” kha an hman. Jesuh Pathian a sinak kong an chim tikah,” “Bawipa” timi biafang kha an hman ve.