November 24

Relflection

Thawngṭha: Luke 21:1-4

Sifak Nuhmeinu i Thawhlawm

Mi pakhat nih bawmhnak na herh ahcun mirum sin si loin sifak sinah kawl tiah a ti. Mi tampi nih fund kawlnak ah hmuhtonnak kan ngei. A caan ah sifakmi hna cu, a tlangpi in, mirum hna nakin an sian deuh ti kha kan hmuh. Zeiti a si hmanh ah, phunglam ah aa dangmi a um zungzal i aa dangmi cu aa dangmi a si peng. Asinain tahchunhnak ah, U.S. News and World Report, (December, 1991) nih a chimmi cu, American pawl nih 1990 kum ah siannak in an pekmi pumpak tangka: sifakbik innchungkhar cu 5.5% an si i, a rumbik innchungkhar cu 2.9% an si. Cun, sifak rethei bawmhnak caah tangka hmuhnak a tambik a petu kum upa phu cu kum 65 in 74 karlak ah 4.4% an si i a niambik cu kum 18 in 24 karlak ah 1.2% an si. Hi data hi ahmaan le hmaanlo ka hngal lo nain a hmaanmi a si. A tlawm deuhmi nakin tamdeuh a ngeimi nih tamdeuh an pek lai ti cu a fiang ko. Cun a cangmi cu a kalhmi a si.

Nihin thawngṭha nih nuhmei sifak pakhat kha a kan hmuhsak nain a lungthin a thiang tukmi a si, zeicahtiah a ngeihmi vialte, a nunnak vialte kha biakinn tangka chiahnak caah a pek. Cun a sifahnak nih a covo pek kha a kham lo. Amah i bawmhnak cu midang bawmhnak he tahchunh ahcun tangka tlawmte lawng a si ko nain anmah i bawmhnak cu an rumnak tampi in a rami a si.

Zeicahdah nuhmei cu a sih a fak tuk?  Nihin thawngṭha hlan i Luka 20:46-47 thawngṭha bia nih, zeicahdah nuhmei nu cu a sifahtuk timi a kan pek. Farasi le phungbia cawnpiaktu saya hna nih ‘nuhmei hna inn kha an eidih (chuh) hna caah a si!’ Phundang in chim ahcun, sifakmi hna sifahnak caah zatlang hremnak le dinlonak a chuahtertu a si. Sifakmi hna sinah an ngeihmi thil hrawm loin an lakmi ‘an chawva tamdeuh chungin’ a petu hna i laksawng cungah Pathian a lung a tling lo cu khuaruahhar awk a si lo.

Caan vialte ah mithiang pahnih, St. Augustine le St. Mother Teresa of Calcutta nih rumnak le pekchanhnak asiloah zaangfahnak kong an chimmi kha ngai hna u sih: “Na duhnak a umnak paoh ah na chawva a um; na chawva a umnak paoh ah na lung a um; na lungthin a umnak paoh ah na lawmhnak a um,” (St. Augustine) le “Na herh lomi cu na pek ahcun, cucu pek a si lo,” (St. Mother Teresa) an ti.

Dawtmi ulenau hna, Pathian cu zeizat dah kan pek timi ah a biapi lo, zeiruang ah dah kan pek timi tu ah a biapi. Pathian nih laksawng a zat kha a zoh lo i a petu thlarau tu kha a zoh.

A donghnak ah theih lomi caṭialtu pakhat sinin a rami, hi tuanbia hi ruahṭhan hna u sih. Pa pakhat cu lung zawtnak a ngei i a rannak in sizung ah an tlikpi tiah a chim. Amah cu hawikomh tlawmpal a ngeih caah a thin a phang lo. Sizung a umlio ah mirum a pu pakhat a thi i dollar million khat a caah a chiahtak. A chungkhar nih zeitindah hi thawngpang cu a lungthin tlawmbik hlawhter dingin chimh khawh a silai tiah an ruat. Phungchimtu sinah va kal i dai tein mipa sinah hi thawngpang chimter dingin biakhiahnak an tuah. Phungchimtu cu a kal i biahalnak leiah zaangfah tein a hruai. Phungchimtu nih cun mizawpa cu dollor tingkhat ro na co ahcun zeidah na tuah lai tiah a hal. Mizaw pa nih, “Khrihfabu ah a cheu cu ka pek lai tiah ka ruah,” tiah a leh. Cun Phungchimtu cu a tlu i a thi ti a si.