A thi cia mi hna thlarau caah thlacampiaknak ni (All Souls Day)
November 2 cu Catholic hna caah a biapi ngaimi ni, “a thi cia mi thlarau hna caah ah thlacam piaknak ni,” asi bang in, Hakha khualipi i khua asa mi Catholic (RC) hna cu zinglei suimilam 8:00 am, 10:00 am ah St.Joseph Cathedral ah thlarau hna caah Missa raithawinak voihnih an tuah. Cun zanlei 1:00 pm ah Catholic thlanmual, Cawbuk ah, a thi cia mi hna thlarau hna caah Missa rawithawinak avoithumnak an tuah ṭhan. Cu avoithumnak Missa raithawinak cu Msgr.Jerome Hlawn Khawl i hruainak in tuah asi i siangbawi paruk nih Missa raithawinak ah an i tel kho. Rev.Fr.Dominic Kung Ṭial nih Thawngṭhabia a chim.
Cu lawng si loin Hakha ah a ummi St.Joseph Sister paruk le St.Theresa Sister pahra tluk le, damah saya Catechists pathum an i tel kho ve. Hakha khualipi chung um Catholic Biakinn pali in zumtu Khrihfa hna zathum nak tlawmlo an i tel. Kum dangnak in tu kum ah November 2 ni mithi hna thlarau ca i thlacam ah a ra mi an tam deuh a lang khun.
Kan hnu kum le 2021 kum cu kan boruak ruangah thlan hmun ah kal ngah lo in biakinn ah November 2 caan hmannak rak tuah asi nain tukum cu cunglei nawl ngeitu hna nawl onhnak in atubantukin thlanmual ah caan hman khawh asi.