Jubilee of Hakha Diocese puai tuahnak
Khrih chuahcam kum 2025 Jubilee cu Hakha Diocese level in 23 November 2025, Khrih Siangpahrang puaini Zarhpi ni ah, St.Joseph Cathedral, Hakha ah tuah asi. Zinglei 9:30 (Missa rawithawinak hrawmthawh hlan ah) Rev.Fr.Lucas Ṭha Ling Sum (Chancellor of Hakha Diocese) nih Hakha Diocese tuanbia kong chimnak a ngeih. Suimilam pahra ah Bishop Lucius Hre Kung le siangbawi hna cu siangbawi inn (clergy house) in an rak i thawh i ar tlaang tein (procession) in Biakinnpi chungah an lut. Cu an luh lio ah Khrihfa hna nih “Khrih Uktu, Khrih Siangpahrang, Khrih cu teitu asi,” ti mi hla kha Kawlholh le Latin holh in an sak.
Hakha khualipi chungum Catholic biakinn pathum ( Sacred Heart Church, St. Charbel Church le St. Valentine Church) in Khrihfa hna zong St.Joseph Cathedral i fonh dih in Hakha Diocese i Jubilee puai ah an i tel kho. Cawbuk sang in Minor Seminarians hna nih Salm hla saknak in thazaang an chuah ve. Choir group hna cu St.Joseph Sisters hna i boarders ngakchia hna le St.Joseph Cathedral rector i boarders hna le Minor Seminarians hna nih tema tein ṭuanvo an lak. Bishop Lucius Hre Kung le tlangbawi (siangbawi) 34 nih Jubilee Missa raithawinak an tuah.
Hakha Diocese lutlai Bishop Lucius Hre Kung nih a phungchimnak ah, ” Catholic Khrihfa hna cu, tlangbawi phun, profet miphun, siangpahrang miphun” kan sinak kong a chim. Siangpahrang miphun cu siangpahrang innchung i nunzia le dun le daan kha zulh a herhnak kong, England siangpahrang King Charles III zong nih a naupa Andrew i dawhcahlo nunzia ruangah, a nau Andrew cu siangpahrang tefa nih a ngeihmi minṭhatnak le covo vialte a lakpiak dihnak kong, bianabia tahchunhnak ah lak in a chim.
Missa raithawinak a donghnak thluachuah pek hlan ah Rev.Fr.Dominic Thawm Hlei Hnin nih, Jubilee of Hakha Diocese tuahnak kong le tinhmi le asullam hrilhfiahnak a ngei. Hi Jubilee philhlonak ah tiah caṭial lei zuamnak laksawng a ngahmi mincazin thanhnak le cu laksawng a ngahmi hna cu kum 2025 Jubilee kharnak puai tuah tik ah laksawng pek an si lainak kong a thanh chih. Bishop Lucius Hre Kung nih Missa Raithawinak a donghnak thluachuah a pek dih hnu ah Bishop le tlangbawi hna group hmanthlaknak an ngei. Cu lio ah kum 2025 Jubilee theme hla “mei alh bang” timi hla kha Kawl hla in an sak i Missa raithawinak an donghter. Zinglei 9:30am in pumh thawkmi cu chun 12:30 pm ah pumh a dih.