November 22

Luke 20:27-40

Thawhṭhannak Kong Biahalnak

Nihin thawngṭha ah Jesuh cu Sadusi pawl he an i tong. Sadducee cu Judah mi hna i ramkhel-biaknak lei phu pakhat a si i an min cu tsaddiqim timi in a rami a si, a sullam cu miding tinak a si. Mah min cu “Sadoc” timi min taktak he aa pehtlai, Siangpahrang David le Solomon chan ah a minthangmi tlangbawi ngan (1Siangpahrang 1:8, 26, 32) a si. Upa hna i phunglam chapmi ah pharisaic lungthin peknak he aa ralchanh in Nawlbia cafang zulh kha a chim duhmi a si tiah an ruah.

Sadusi pawl cu uknak nawlngeitu, Rom cozah he naih tein an um caah mipi tam deuh nih an duh hna lo. Ram dawtnak a ngeimi le amah lawng aa thleidangmi Farasi pawl cu mipi hruaitu ah an cang chin lengmang. Party pahnih karlak i biaknak lei i dannak hna lakah: Sadusi pawl nih thawhṭhannak, thlarau thih khawh lonak le vancungmi an um lonak (Matthai 22:23; Marka 12:18; Lamkaltu 23:8) an alnak hna hi an si kho. Cu bantuk cun Farasi mi hna nih an kilvenmi le Pathian nih a khiahmi nawlbia chapmi ah an chiahmi holh in chimmi phunglam hna kha an hlawt ve. Cucaah hi thawhṭhannak zumhnak kha hitin an i alnak thawngin an nihsawh ti cu a fiang ko: “Thawhṭhannak ni ah cu minu cu aho nupi dah a si lai? tiin Jesuh kha an hal.

Sadusi pawl nih thawhṭhannak kha zeicah an zumh lo? Fr. Gerru del Pinado i phungchimnak ah hi phu ningin cun, cu bantuk zumhnak cu Moses Nawlbia ah fiang tein a umlo tiah a ti. Nawlbia a lehtu cheukhat nih an chimmi cu tuaktannak men a si an ti. Sihmanhsehlaw, hi zumh lonak hnulei ah a thuk deuhmi thil pakhat a um. Jesuh chan lioah, Sadusi pawl cu Judah mibu chungin middle class an si i mirum, bawiphun le tlangbawi phu hna an si. Cucaah “a lung a tlingmi caw” bantukin an rak nung tiah chim cu ṭhumdeuh in chim kha a si. Annih cu zeihmanh an herh lomi, anmah tein aa ukmi an si. Anmah bantuk nunnak he cun aho nih dah thawhṭhannak hi a herh lai? Annih caah cun, thih hnu nunnak a um ahcun, vawlei nunnak i sunparmi pehzulhnak sawhsawh a si. Asinain Jesuh nih biahalnak cu Moses nih a ṭialmi cu, Pathian nih Moses sinah a kangmi thinghnah chungah a umnak a langhter tikah, Bawipa nih Abraham, Isak le Jakob Pathian ka si tiah a ti, (Exodus 3:6) tiah a leh.

Thih hnu nunnak a um ti chimtu ahohmanh thihnak in a tho ṭhanmi an um rih lo. Thih hnu nunnak a um taktak maw? Kan thih hnu ah zeibantuk nunnak dah kan ngeih lai? Asinain hi tuanbia nih hin Pathian Pennak caah tam deuh in rian kan ṭuan khawhnak hnga thazaang a kan pek lai. A voikhatnak communion ka lak lioah kan parish pa nih vanram kong tuanbia a kan chimh. Vancung kutka kan phak tikah Khrih le Mithiang Peter pumpak in an kan don lai a ti. Annih nih aa lawm taktakmi minung in a khatmi lentecelhnak hmun nganpi ah an kan luhpi lai i an dihlak in an kan lawmhpi lai. Khrih kan hal tikah: “Hi vialte hi ahodah an si?” Amah nih, “Hi hna hi hika phanh khawhnak ding caah kan bawmhmi thlarau vialte an si i, an kuttlaih in kan i lawm tiah an ti,” tiah a leh lai. Mah ni cu zeitluk in dah a nuamh lai!