20 Nov Thursday

Luka 19:41-44

Jerusalem caah ngaihchiatnak hla

Dawtmi ulenau hna, Min langter lomi pakhat nih: “Himnak cu ṭihnung a um lonak ah siloin Pathian hmai ah a um” a ti.

Jesuh nih, nihin thawngṭha ah, Jerusalem caah mithli a tla i a ṭap. Zeicahdah Jesuh cu a ṭah? Amah bia an ngaih duh lo caah a ṭap. Amah sinah an lungthin an hun duh lo caah a ṭap. An lawmhnak le khamhnak a duh caah a ṭap i a hringmi ramlak ah hruai a duhmi tuukhal sinin an i hlat. Porhlawtnak le zumh lonak ruangah Pathian biaceihnak bia an hngalhthiam lo caah a ṭap. Cun Jerusalem cu Pathian umnak le bawiṭhutdan (Jer. 3:17ff.); Pathian nih a min umnak caah a thimmi hmun (1Siangpahrang 11:13); cun Pathian nih a Siangpahrang a chiahnak tlang thiang (Salm 2) a si .

Fr. Rudy Horst, SVD nih a chimmi cu, kan chan ah hin, Pathian zong nih kan ram le vawleicung pumpi ah a fale nih a herh lomi sifahnak, harnak le fahnak an tuarmi a hmuh tikah nifatin a ṭap ve ko lai tiah a ti. Hi sifah harnak hna hi a tam deuh cu Pathian zeirellonak ruangah asiloah a duhnak dohnak hrut ruangah a chuakmi an si. Cucaah annih cu rawlṭamnak le sifahnak, ṭhihphaihnak le tlaihhremnak, ritnak sii hmangmi le zuritmi hna nih an thah hnanak an tuar. Zumhawktlak lonak le pakhat le pakhat i theihthiamnak le ngaihthiamnak i zuamlo ruangah kan chungkhar ah a herh lomi harnak tampi a um.

Khrih nih hi harnak hna chungin chuah khawhnak lam a kan hmuhsak cang. Asinain Jerusalem khuami hna bantukin amah cu zeiah kan rel lo i kanmah duhning in kal kan duh deuh. Cun Pathian nih kan cungah a ṭap. Cucaah Jesuh nih nihin thawngtha ah hitin a ti: “Nihin ahhin daihnak a chuahtertu thil kha na hngalh ko nain atu cu na mit in a thup cang.” Oh, a si nain, ‘Jerusalem’ timi biafang cu “daihnak” timi sullam a ngeimi salem timi biafang in a min a lakmi a si nain Jerusalem cu harnak a tong i hi hmun ahhin profet pawl an thah hna.

Hi harnak hna chungin kan i hlat khawh nakhnga Khrih lam cu zeidah a si? Hi Khrih lam hi daihnak lam a si. Daihnak, daihnak-sernak le daihnak sernak kong kha a phunphun in kan theih cang i kan chim cang nain zeihmanh a cang lo bantuk a si. Moody Bible Institute’s Today In The Word (June, 1988, cahmai 33) ningin, Personnel Journal nih hi khuaruahhar zatlang relnak hi a langhter: tuanbia ṭial hramthawk in, vawleicung pumpi cu caan zatuak pariat tluk hmanh ah daihnak a um lo! A hlathlainak ah, kum 3530 chung tuanbia ṭialmi chungin kum 286 lawng nih daihnak a hmuh ti kha a hmuh. Cun, remdaihnak hnatlaknak 8000 leng an tuah i an hrawh. Hi data cungah hram bunh in, kan tuah dingmi pakhat lawng a tang rih tiah ka ruah, cucu, daihnak kha caan pek i aṭha lai maw ṭha lo ti zoh kha a si.

Cun hi daihnak cu lungthlennak thawngin hmuh khawh a si. Piantharnak cu sual ngaihchihnak taktak he sualnak kan hlawtmi kan biakhiahnak a si. Sualnak kan hrialnak a ruang cu lam pakhat kan zulh tikah lam diklo ah kan um ti kan hngalh caah a si. Cu lam ah kan kalpeng ahcun Pathian Pennak a simi kan phanhding hmun cu kan phan bal lai lo. Cucaah sualnak in kan i mer asiloah kan i thleng a herh. Lam diklo ah kal kan ngol i a dikmi lam ah kirṭhan kan thawk canglai. Piantharnak nih kan nunning lam kha a palhmi lam in a dikmi lam, Pathian nih a duhmi lam ah a thlen lai.

WIT and WISDOM (February 1, 2000) in tuanbia pakhat an chim i, ngakchia nute pakhat nih Khrihfabu luh a duhtuk caah Pastor nih lungthin thlennak na tong maw tiah a hal. Anih nih “A si” tiah a leh. “Ahlan ah misual na rak si maw?” Anih nih: “A si,” tiah a leh. “Atu cu misual na si cang maw?” Anih nih, “A si,” tiah a leh ṭhan.

Dawtmi unau hna “A si ahcun, zeidah aa dannak a um?” Caan tawite khua a ruah hnu ah, “Khrih ah ka rak i mer hlan ahcun sualnak ka dawi i misual ka rak si, atu cu sualnak in a zammi misual ka si cang,” tiah a ti.