November 19

Luke 19:11-28

Sui Phaisa Bianabia

Pathian pennak cu a lang colh ko lai tiah mipi nih an rak ruah. Asinain Jesuh nih Pathian pennak cu a lang colh lai lo tiah a chim. A thawk cang nain a tling rih lo. Cucaah, cu karlak ahcun pennak caah rianṭuan dingin ruahnak a kan cheuh, cucu, kan thiamnak, thluachuahnak le velngeihnak vialte kha Pathian sunparnak pek awk le kan innpa caah ṭhatnak tuah awkah hman ding kha a si. Asinain abik in sual ngaihchihnak ah a kan auh. Ngaihchihnak timi cu mi pakhat i lungthin asiloah tinhmi thlen tinak a si. Pennak kong he pehtlaiin, The Word in Life Study Bible, (1993 pp. 18-19) nih a chimmi cu, aa tel:

1. Zumhawktlak sinak ah thlennak. Khrih cu Siangpahrang a si ahcun, kan upatnak, zumhawktlak sinak le nawlngaihnak pek awk tlak a si. A nawlngeihnak le ṭhawnnak tangah kanmah le kanmah kan i chiah. A chimmi paoh tuah dingin bia kan khiah. Cucu Bawipa thlacamnak ah a chim lengmangmi biafang hna i a sullam cu a si, “Na pennak cu rung tlung ko seh, vancung ah na duhnak tuah a si bantukin vawlei cungah tuah si ko seh” (Matt 6:10).
2. Ruahchannak thlennak. Pennak ruahnak he pehtlai in mi nih an tonmi harnak pakhat cu a hmun ah a um rih lo. Cun vawlei cu nikhat hnu nikhat Pathian he aa hlat chin lengmang ko rua tiah a lang. Cu ruangah, atu le hika ah nun cu a fawi, atu nunnak hi a biapi bikmi a si bantukin a si. Asinain pennak chungah cun atu kan hmuhmi nakin nunnak cu ahlei dueh. Jesuh nih hmailei pennak kong he pehtlaiin bia a kamh hna, a tling rih lo hmanh ah dirh a si cang i zungzal in a hmun lai (Matt 6:13).
3. Man thlennak. Kan nunphung nih hmuhnak, hlawhtlinnak, zalonnak le muisam kha a sunsak. Nunphung dang nih ziaza dang kha an sunsak. Asinain pennak man ngeihnak cu Pathian caah abiapi bikmi kha a langhter. Jesuh nih Matthai 5:3-10 ah a sining tampi a langhter i cu hna cu Thluachuahnak tiah theih an si. Mi tampi nih hi Pennak manngeihnak hna kha an cohlan i an rian, an chungkhar le an hawikomhnak ah mah man hna a langhtermi thimnak an tuah.
4. Biapi ah chiahmi thlennak. Mi hna i an man hneksaknak taktak cu zeitindah an caan le an tangka an hman timi hi a si. Jesuh nih cu kong cu pennak kong he pehtlaiin direct in a chim (Matt 6:24-34). Rian man kha a niamter lo i thilri chawva herhnak kha a zorter lo. Asinain a zultu hna kha nifatin an nunnak ah pennak man hna kha zuam (challenge) dingin a forh hna.. “Pennak kha hmasabik ah kawl” (Matt 6:33) nih pakhat i rianṭuannak le a phichuak cungah Khrih-bantuk hmuhning a chiah.
5. Nunchung rianṭuannak ah thlennak. Mi cheukhat cu an nunnak in rian nganpi ṭuan awkah an i forh. Midang cu nikhat hnu nikhat tinhmi ngei loin an nung, tinhmi le lamhruainak an ngei lo. Zei lam hmanh in si sehlaw, Jesuh nih mi pakhat nunnak hmuhning kha a thlen. A zultu hna kha tinhmi le mission rian a pek hna: pennak tangah a ummi bantukin nun le nifatin nunnak le rianṭuannak ah pennak man hna kha ṭhanchoter. A donghnak ahcun, a zultu hna nih a bia kha vawleicung hmunkip tiang karhter a duh hna, cucaah mi vialte nih an Khamhtu le Siangpahrang a si caah amah cungah zumhawktlak sinak pek khawhnak caanṭha an ngei lai (Matt 28:18-20).

Dawtmi ulenau hna, Fr. Jerry Orbos, SVD nih hitin a hal: “Na nunnak ah thlennak a cohlang lomi hmun a um maw, zeicahtiah an ṭha cang tiah na ruah? A ṭhami cu a ṭha deuhmi ral ah a cang kho ti kha philh hlah.”