18 November – Reflection
Bible : Luke 19:1-10
Ngunkhuai khawltu Zakia
Dawtmi ulenau hna, hi Zakia tuanbia in kan i lawmhter dingmi thil pathum kan cawn khawh:
Pakhatnak ah, an muisam ruangah midang kha soisel lo dingin kan i ralrin tuk a hau. Jesuh nih Zakia i khual si aa thim tikah a zultu hna cu an phunzai tiah an kan chimh. Khuachung ah “a thiangmi” mi tampi an um ko nain, misual he um a thim ti kha an zum kho lo. A si, mipi mithmuh ahcun Zacchaeus cu contravida (a kalhmi) a si nain Jesuh mithmuh ahcun nunnak a si. A ruang cu a thukmi thlennak a ton caah a si i a ngeihmi thilri cheukhat cu sifakmi hna sinah ka pek hna lai i ahohmanh hlen an si ahcun a let li in ka pek hna lai tiah a thanhnak nih a langhter. Hi zawn ahhin kan theihmi minung hna i an thinlung le ruahnak cu Pathian lawng nih a theih caah, an cungah fakpiin biaceihnak kan tuah sual nakhnga lo kan i ralrin ngaingai a hau.
Pahnihnak ah, Zakia bantukin, a kalmi Jesuh hmuh kan duh awk a si. Zakia nih mibu kha a kaltak hna i Jesuh hmuh awkah sycamore (theipi kung) cungah a kai. Kannih caah cun, Jesuh hmuh khawhnak ding caah kanmah pumpak nih kan kai dingmi thingkung cu zeidah a si? Zingka kan thawh tikah le zaan kan ih tikah Jesuh hmuh cu kan caah a fawi, zeicahtiah hi caan hna ahhin kan caan suaimi, rian le lungretheihnak hna he kan buai lo. Asinain nifatin kan nunnak caan sawhsawh ah Pathian i umpinak kan philh sual nakhnga lo atu le atu kai ding thingkung pakhat kan kawl a hau.
Pathumnak ah, toidornak taktak le ngaihchiatnak taktak he ngaihthiamnak kawl tuah. Zakia nih palhnak nganpi a rak tuah ti kha kan dihlak in kan hngalh. A nawlngeihnak hmangin mipi hlennak in thilri leiah amah le amah aa rumter. A duhfahnak nih a chiaṭha thleidannak lungthin a buaiter ti cu ka zumh. Asinain Jesuh cu toidornak taktak le ngaihchiatnak taktak he sycamore thingkung cung kai in a kawl, ngakchia le sal lawng nih an tuahmi a si, khuachung i bawi minthang a si ko nain Jesuh nih a ngaihthiam. Misual kan caah cun, Pathian nih ngaihthiam kan sinak cu: 1) kan sualnak le kan palhnak kan cohlan; 2) kanmah le kanmah kan i remh asiloah sualnak pakhat kha tuah ṭhan kan hrial; 3) Zakia nih a tuah bantukin kan sualnak nih a chuahpimi rawhnak kha kan remh asiloah kan chamṭhan caah a si. Zakia nih hitin a ti: “Zohhmanh, Bawipa, ka ngeihmi thil hnarcheu cu sifakmi ka pek hna lai.” Midang a hlen hna ti zong a cohlan i remhṭhan dingin bia a khiah.
Dawtmi unau hna, a donghnak ah Nunnak caah Zulhphung Pahra a um tiah a rak chimmi theih lomi source pakhat sinin hi bia hna hi ruat hna u sih, cu hna cu:
Thil pakhatkhat pek chih (hri aa peh lo)
Zaangfahnak tuah (cun philh)
Tar pawl he minute tlawmpal hmang (an hmuhtonnak cu man chimcawk lo lamhruainak a si)
Naute hmai kha fakpiin zoh (cun khuaruahhar in um)
Hnih lengmang (nunnak naltertu hriak a si)
Lawmhnak chim (nikhat ah voi thongkhat lawng a zalo)
Thlacam (asiloah lam na tlau sual lai)
Rianṭuan (vim le thazaang he)
Zungzal in na nung lai tiah timhtuahnak ngei (zeicahtiah na nung lai)
Thaizing ah na thi lai bantukin nung (zeicahtiah thaizing ah na thi lai) hna an si.