BUPI THAWHKEHNAK A HRAM LE RIAN

            Bupi kong biathuk kan hlathlainak ah Thumkawmh Pathian aa thawhkehnak le tuanbia chungah duhsah tein a rak langhnak kha kan zoh hmasa lai.

            A zungzal a hmunmi Pathian nih a fimnak le a ṭhatnak in van le vawlei kha a rak ser hna i a Pathian sinak kha hrawm awkah minung kha a thim. Mah nunnak kha hrawm awk a Fapa sinah mi vialte kha a auh hna. Pathian nih Khrih a zummi vialte hna kha a Bupi thiang chungah hmunkhat tein auh kha a rak ruah. Mah Pathian chungkhar cu duhsah tein sersiam a rak si i minung tuanbia a dotdot ah muisam kha a rak lak. Cucu Pathian tinhning tein a rak si. A ngaite ah cun vawlei hramthawk ah a muithlam in a um cang mi a si i Israel miphun tuanbia le Biakam hlun ah khuaruahhar awkin timhtuah a rak si. Vawlei donghnak caan ah cun Thiang Thlarau tawihnak in langhter a si lai i sunparnak he a tlinnak ah a phan te lai.

            Hmasa kumzabu chungah Khrihfa mi nih, “Vawlei cu Bupi ruah ah ser a rak si,” an rak ti. (Pastor Hermas; Aristides, St. Justin, Tertulian) Pathian nih amah nunnak a hrawm hnga mi caah hi vawlei cu a ser. Cu hrawmnak cu Khrih ah mi vialte i pumhnak in a chuak hnga mi a si i, cu i pumhnak cu Bupi kan timi cu a si. Bupi cu a zeizong vialte i kawltung a si. (St. Epiphanius d, 181 C) Pathian nih mahtluk in a fak i rawhralnak a simi vancung mi hna an tlaknak le minung sualnak kha nawl a pekmi cu a ṭhawnnak vialte kha hmuhsak awk le hi vawlei cungah a pek duhmi cu a dawtnak vialte kha langhter a duh caah a si.

            Pathian duhnak cu sernak kha a si i “Vawlei” tiah auh a si bantuk in a tinhnak cu minung khamhnak kha a si. Cucu “Bupi” ti a si. (Clement of Alexandria).

            Pathian miphun hna hmunkhat tein anni pumhnak cu sualnak nih minung le Pathian ti kawmhnak a hrawh cangka in aa thawk. Cucaah Bupi i pumhnak cu sualnak nih a chuahpi mi ṭhatlonak cungah Pathian nih a lehnak a si. Mah pumhṭhannak hi mi vialte lungthin chungah a thlite in a rak chuak. Miphunkip chungin amah kha a ṭih i a dingmi thil kha a tuahmi cu Pathian cotlak mi an si. (Lam 10:35).

            Pathian miphun pumh ding timhtuahnak cu khahlan Pathian nih Abraham a auh i amah kha miphun nganpi pa na si lai, tiah bia a rak kamhnak caan khan aa thawk. (Gen 12:2, 15:5-6). A naih in timhtuahnak cu Israel kha Pathian miphun in a thimnak in aa thawk.

            Mah thimnak ahhin Israel cu hmailei ah miphun vialte hna i pumhnak hmelchunhnak ah a cang. (Cf. Ex. 19:5-6, Dt. 7:6, Is 2:2-5, Mic 4:1-4). Sihmanhsehlaw profet hna nih Israel kha biakamnak buar in hlawhhlang nu bantuk in a um tiah sual an puh. Annih nih cun a thar i a zungzal a hmun hngami biakamnak kha a thanh. “Hi biakam thar kha Khrih nih a tuah”. (Cf Hos 1, Is 1:2-4, Jer 2:31-34, Is 55:3).