November 13 – Reflection
Aw ngaihnak 👇🎧👇
Bible: Luke 17:20-25
Pathian Pennak A Ratnak kong
A ongmi tikhor pawngah a pu he a dirmi ngakchia nute kong tuanbia hi ka rel. Balṭin pakhat an ṭhumh i din awk ti tlawmpal an rak lak. A pu cu hitin a hal: “Pupu, Pathian cu khoika ah dah a um?” tarpa nih ngakchia nute cu a cawi i a ongmi tikhor cungah a tlaih. “Atang ti kha zoh law na hmuhmi kha ka chim tuah,” tiah a ti. ‘Keimah le keimah kaa hmuh,” tiah ngakchia nute nih a ti. ‘Cuka ahcun Pathian a um, nangmah chungah a um” tiah tarpa nih a ti.
Nihin thawngṭha ah, Farasi mi hna nih Jesuh kha, Pathian Pennak cu zeitik ahdah a rat lai timi kong an hal. Jesuh nih Pathian Pennak cu zoh khawh a si lo tiah a lehnak in an khuaruah a harter hna. “Hika” asiloah “khika” si loin ‘Pathian Pennak cu nan lakah a um,’ cucu kan lungthin chungah a si. Pathian pennak cu Jesuh Khrih, Pathian Fapa le vawlei Khamhtu ah a lang cang. Pathian pennak cu atu lio thil cangmi le caan donghnak ah a lang dingmi thil kaphnih asiloah hika ah a um cangmi thil a si tiah a chim nain a dihnak cu caan donghnak ah a cang lai tinak a silo.
Cu pinah, Catholic Khrihfabu Catechism nih Pathian Pennak cu Pathian uknak asiloah pennak a si ti zong a kan cawnpiak. Catechism nih hitin a ti: “Pathian pennak cu Thiang Thlarau thawngin dinnak le daihnak le lawmhnak a si” (Rom 14:17). Pathian Pennak cu Bia Minung cannak in a rat tikah a nai cang; Thawngṭha ah thanh a si; cucu messiah Pennak a si, Jesuh, Messiah pumpak in a um; Eucharist (Bawipa Thisa) in kan lakah a um peng. Khrih nih a Lamkaltu hna kha Pennak phuannak rian a pek hna i Thiang Thlarau thawngin a mi hna kha tlangbawi pennak; Khrihfabu; ah a ser hna, cu chungah cun Pathian Pennak cu khuaruahhar in a um, zeicahtiah amah cu vawleicung Pennak thlaici le hramthawknak a si. Bawipa Thlacamnak (‘Na Pennak cu tlung ko seh’) ah a donghnak sunparnak he a langhnak caah thla kan cam, cu tikah Khrih nih Pennak cu a Pa sinah a pek lai,” (CCC nos. 541-554, 709, 763, 2816, 2819).
Dawtmi ulenau hna, cucaah Pathian Pennak cu chunglei in aa thawk i Pathian bantuk le kan thinlung hna kha a dawtnak, zaangfahnak le ngaihthiamnak ṭhawnnak a hngalmi miphun si awkah a thlen. Bawi Jesuh cu a bia ah a um, a pum Khrihfabu ah le “Changreu cheunak,’ a Thiang Missa Raithawinak ah a um. Zumhnak mit in Amah a kawlmi hna sinah relcawk lo lam tampi in Jesuh nih aa phuang. Bible chung i Pathian bia kan rel tikah Jesuh nih a kan chawnh i Pa lungthin le thinlung kha a kan hmuhsak. Bawipa cabuai kan naih tikah, Jesuh nih kan chung i Pathian nunnak taktak a chuahtertu thlarau rawl ah amah le amah aa pekchanh (‘Keimah cu nunnak changreu ka si,’ Johan 6:35).
A donghnak ah a cunglei biatak lengah, Pathian Hmuhtonnak timi capar nih Pathian nih kan cungah a tuahmi kong kha a chim. Cu nih cun:
Pathian cu kan pawngkam ah rian a ṭuan zungzal.
Pathian nih kanmah he pehzulh tein dawtnak pehtlaihnak a kawl, cucu, a tak le pumpak a si.
Pathian nih a rianṭuannak ah amah he i tel ve dingin a kan sawm.
Pathian nih Thiang Thlarau hmangin Bible, thlacamnak, thil sining le khrihfabu hmangin amah le amah, aa tinhmi le a kalning aa phuannak ding caah bia a chim.
Amah he rianṭuan ṭi dingin Pathian nih a kan sawmnak nih zumhnak le tuahsernak a herhmi zumhnak harnak ah a kan hruai zungzal.
Pathian nih a tuahmi thil ah Pathian he i fonh awkah kan nunnak ah thlennak nganpi kan tuah a hau.
Dawtmi ulenau hna,
Amah nawl kan ngaih tikah le kanmah thawngin a rian a tlinter tikah hmuhtonnak in Pathian kan hngalh.