St. Josaphat, Bishop & Martyr (1580-1623)

Audio (aw) zongin ngai khawh a si. 👇👇

Bupi pumkhat sinak fakpi in aa zuam buin a rak thimi Mithiang Josaphat cu 1580 kum, Ukrian ram, Vladimir ah a chuak. Vilan khua in chaw-dawrpa pakhat sin i rian a ttuan lioah sipuazi leiah ttuantti ding le a bawipa fanu pakhatkhat he i tthut-umh dingin sawm a rak si nain Josaphat cu Zateik pakhat si dingin biachahnak a rak ngeih cang caah a al hna. 1604 kum ah Vilan khua Thumkomh Pathian Zateik Sianginn ah a lut i a rauh hlan ah Siangbawi cannak a hmuh. A dingfel tuk mi nunnak le pum semrel nunnak in a rak nung i Orthodox bu le Rome bu i komhtthannak caah fakpi in a rak chim.

1617 kum ah Polosk khua Bishop ah rian khinh a rak si hnu ah Pathian bia cawnnak cauk a rak chuah. Josaphat cu a bik in voikhatnak tlawmlo leh aa thah mi Siangbawi hna kha thlen le tthanchoter dingah bia aa khiah. Hika zawn ahhin kan theih awk cu, (Nichuahlei Orthodox pawl Canon Upadi ningin leh aa thah mi kha Siangbawi cannak pek khawh an si nain, a nupi a thih ahcun lehthahnak nawl a ngei ti lo). Josaphat i thawngttha rian ah teinak a hmu mi nih Orthodox bu hna kha fakpi in an thin a hunter hna. Annih nih Josaphat kha “Thlarau fir” tiah an auh. Josaphat nih, “Keimah cu Rome bu he komh ding le St. Peter (Pope) i aana caah thih dingin timhcia ka si” tiah a rak chim. 1623 kum ah Josaphat cu zingka thlacam dingin Biakinn lei a kal lioah kalsual (zumhnak a palh) mi hna nih an rak doh i meithal kuan in a rak thi.