St. Martin of Tours, Bishop

Audio (aw) zong in ngai khawh a si. 👇👇

Ralkap hna zohkhenhtu Mithiang Martin cu AD 316 kum, Hungary ram, Pannomia khua ah RC a silomi budang nu le pa nih an hrin. Rome cozah bawi pakhat i fapa a si bantukin ralkap chungah hramhram in an luhter. Kum 23 a si, Amiens i sakhaan ah an um lioah a khua a sihtuk caah a thi dengmang cangmi hal-vak pakhat kha kutka pawngah a hmuh. Chikkhat lo ah a ralkap angki kha cheuhnih ah a cheu i cheukhat kha a pek colh. Cu zan a mang ah Bawi Jesuh nih mah angki aa hruk kha a hmuh. Cu thawkin ralkap rian kaltak in Pathian rian tu ttuan ding kha a lung ah a um peng. Asinain Barbarian mi ttha lo ral pawl cu ral an tuk laite a si lengah Siangpahrang Julian zong nih mah ruahnak cu mi ralchia ruahnak a si tiah a sullam a hmuhpiak caah Martin nih, “Jesuh Khrih min in hriamnam i tlaih loin ral chungah dir ding le ral hna sinah keimah pakhatte lawng kal dingin timhcia ka si ko” tiah a rak leh. Cu hnu nikhat ah ral hna nih daihnak lak dingin khuaruahhar awk in an rak chimh hna. Cu tikah Martin cu ralkap rian in chuah le tipil innak nawl a rak hmu.

A chungkhar hna kha thawngttha a chimh hna hnu ah Liguge ah Zateik aa hruk. AD 371 kum ah Tour khua Bishop cannak an pek. Martin nih Tuukhal `ha a sinak kha a langhter khawh. Zateik Sianginn a sak hleiah Siangbawi hna zong kha ca a chimh hna i khuate fa hna i thlennak kha fakpi in aa zuam. Amah cu Biaknak dang hna ci biakttheng le a thiang mi thingkung hna kha a hrawhpiak hna tiah zumh a rak si. A nunnak a hnubik caan ah a kut pahnih kha van ah a thlir peng. Na sir in na ih ahcun na sia a rem deuh lai a timi hna kha “Vawlei zoh nakin Vancung tu kha ka zohter u” tiah a ti hna. Cu hnu ah a pawng i khuachia a dir kha a hmuh tikah, “Nang, thi dawp a duh mi pa, kei cu na rawl ka si lo, nangmah ei awk rawl ka si kho lo” tiah chim buin AD 397 kum ah a thi, tiah an ti.