8 November – Saturday

Bible:📕 Luke 16:9-15 📕

Bianabia hmannak

Dawtmi ulenau hna, Nihin thawngṭha cu nizan i thawngṭha pehzulhnak a si i Jesuh nih zumhawktlak lo zohkhenhtu kha a zumhfehnak ruangah si loin a felnak le a fimnak ruangah a thangṭhat. Amah cu a fimtuk, zeicahtiah a bawipa i rumnak hmangin a hmailei rian hmuh khawhnak ding caah ṭha tein rian a ṭuan. Cucaah nihin thawngṭha ah Jesuh nih a zultu hna le kanmah kha amah caah hawikom sernak caah tangka tampi a hmangmi hi zumhawktlak lo zohkhenhtu keneh zulh dingin a kan forh. Kan chawva cu hmailei zungzal kan nunnak caah kan hman a hau.

Mithiang Luka lungthin ahcun, mi sifak sinak cu kan chawva hmannak thawngin sifak le miharsa hna he hawikomhnak ser kha a si. Pathian nih a ngaihthiamnak le bawmhnak kan herh lio ah a kan zaangfah bantukin an herh caan ah zaangfahnak le siangnak kan ngeih caah kan hawikom ah an cang. Hi hna hi Pathian biaceihnak hmaiah kanmah leiah an um lai, zeicahtiah kan chawva cu an sinah kan chiah cang. Mithiang Matthai thawngṭha zongah kan hmuh bantukin: “Ka unau hna lak i a hmebik cungah nan tuahmi paoh cu keimah cungah nan tuah,” (Matt 25:40). Phundang in chim ahcun, bawmh a herhmi midang cungah zaangfahnak ngeih hi a si.

Asinain Jesuh nih ralrinnak a kan pekmi cu zumhawktlak lo, dinfel lo le bochan tlak lo cu a zapi tein ahmaan lo a ti. Phaisa hmuh cu a poilo nain lihchimnak, zumhawktlak lonak, thahnawnnak le hlennak in phaisa thurhnawm ter asiloah phaisa hmuh cu a palh ti zong a kan theihter.

Jesuh nih thilri chawva he hawikomhnak tuah ding zong a kan theihter, hawikomhnak phunglam hrampi, ‘hawikom kha zeitikhmanh ah vawlhpamh hlah u’ timi kha philh hlah u sih. Rumnak cu hawikom a si ahcun vawlhpamh awk a silo. Rumnak ningcang loin hmannak langhternak pakhat, Fr. Gerry del Pinado, SVD nih a phungchimnak ah a langhtermi cu, midang caah rawhralnak a chuahtertu thil hmuhnak cu ziaza rawhralnak a si a ti. Hi kong ahhin kannih cu hawi si loin mifir kan si. Rumnak ningcang loin hman zong hi zeitlukin phungning a si zongah thil tampi ngeih luaimai (khon) a si, midang nih kan ngeihmi thil tlawmpal hmanh an ngeih lo tikah, zeitluk in cuca i rian an ṭuan zongah. Kan ngeihmi cu thluachuah a si i cucu zohkhenhnak lungput in pekmi a si ti kha voikhatte i cinken hna u sih. Kanmah ca lawngah siloin midang ca zongah kan hman lai. Rumnak Jesuh nih: “nanmah caah hawikom i ser u” a ti i “rumnak cu midang caah thluachuah a sitertu ca lawngah thluachuah a si.” (Fr. Jerry Orbos, SVD, Inquirer Moments Cycle C sinin)

Dawtmi ulenau hna, Pathian nih a kan pekmi thil kha midang sin kan pekchanhnak ah lunglawmhnak le zalonnak kha kan hngal maw?