Khrihfa Nunnak Lamthluan

Audio (aw) zong in ngai khawh a si. 👇👇

Hlanlio i Biaknak karhter rianttuantu hna cu ramleng (ramsing) uknak peng leiah pumpek in an rak kal. Khi ukchung peng hna ah a ummi mising hna i an holh le nunphung hna kha dikthliar hlathlai in an rak cawn. Thinlung teirial teimak in fakpiin an rak i zuam. Mah ukchung peng le ram chungah a ummi, mitampi hna kha bawmhchanh khawh ding a herh lai an timi ngandamnak fimnak, thlaici cinning fimnak, sattil zuat khalhnak fimnak hna kha an rak cawn cia cang. Biakinn ah phungchim pah in ngandamnak fimnak kong zong an chimh chih hna. Ramleng Biaknak karhter ding caah a kakip in tling cikcek ding timhtuah nak an rak ngei hna. Khuate hna ah a kenkip an i chawh pah in thianhlimnak kong kha cawnpiak buin ruahnak an cheuh hna. Khi bantukin zeizongte ah dawtnak kha hmaifon ter in biaknak an rak karhter.

            Voikhat ah lothlopa pakhat cu lo a kalnak ah hling nih a rak chunh i a hma cu a ngan ngaingai. A kepha chung ah thuk piin a pil caah hlingchunhnak hma nih a runh i aa zawtphah. Khi chan lioah khuatemi hna nih siizung, siikhaan hna bochan awk an rak thei lo. Kan bochan lai an ti tik zongah khuapi lei kal a hauh caah an si kho lo. Cu tikah khuate lawngah an theih bal mi ningcang in an rak i thlop. Cu a hma cu Biaknak karhter Siangbawi pakhat nih a rak thloppiak. Asinain, khi bantuk hma phun thlop cu a fawi lo. A hma a thuk bik nak tiang sithuh sirawnh ding cu a har. A hma kha a ttawl piak zongah a chung tiang ttawl ding cu i ralrin ngai a hau. Cuti a si lo ahcun lenglei hmakua a pit lai i hmachung a sem lai i vanchiat ahcun a nunnak hmanh ttihnung a si kha Siangbawipa nih tthatein a theih. Cuticun a kephak in a fengbo tiang tisa (tilum) ciah in ka thianh lai ti zongah cuaihrai nganpi a herh cang. Annih chan ah khibantuk hrai cu khoika hmanh ah hmuh khawh a rak si lo. Cutikah Siangbawipa cu a mah cabuai tang i a hman mi cuaihrai chungah tisa a rawn i a ke kha ciah ding a timhtuah. Lothlopa cu a lau. Zeicatiah Siangbawipa nih a hman liomi cuaihrai chung a ke chiah ding cu a ngamh hrimhrim lo. Siangbawipa nih “na kut na ttawl zongah, na ke na ciah zongah ti he vun ttawl tthan ahcun an thiangtthan ko si lo mei? A har lo. Abiapi mi cu na ke hma chung i nawncek bantuk (ahnai) a chuah kha a biapi, ralttha tein ciah ko” tiah voitampi a lemsoi hnu ah ngamh lo buin a ke kha tisa ah a ciah i a hma cu a rak dam. Hi thil sining kan zoh tikah Biaknak karhter Siangbawi hna i dawtnak an ngeih ning hi zeitlukin a ngan ti kha kan hmuh. Cu pinah India ram dihlak kha dawtnak huham in khuhchilh in a rak ukmi ‘Mother Theresa’ kong zong kha kan theih cio cang ko lai. Mother Theresa pumpak kha chim lo, amah i a ngantuk mi zaangfahnak rian ah rianttuan vein, a nunnak kha biaknak rikhiah chungah aa pechan mi Sister no hna hmanh nih an i zohchunh ding a dih kho lo. Mother Theresa a thih tikah kum upa patar pitar thawkin ngakchia tiang an rak ttap. A ruak vui lioah ram hruaitu President hna thawkin hal-vak tiang, phun sang mi hna thawkin phun niam-michia tiang, mirum hna thawkin misifak tiang nih upatnak an rak pek. Khrihfa biaknak khat le khat chim lo, Budhist, Muslim le Islam hna zong nih annih an biaknak phung ning cio in thlacam piaknak an rak tuah. A thianghlim i a nganmi dawtnak cu ramri a ngei lo.Vawlei ah a karh khawh ti kha a fianter. Tuchan ah teikpan fimnak i thilri muisam hmuhnak hna kha a thuatthuat thanh i aupinak ruangah biaknak lei thinlung khumhnak a ziam bantukin an um. Cucaah kannih Catholic Khrihfa hna caah Zarhpini fatin Biakinn kal, Thlacamnak, hlasak menmen in Pathian thluachuah ka hmuh lai, tiah na ruat maw? Hlan lioah Khrihfa thil timi paralttha hna cu nu le pa, rualchan cingla he a hlatnak ramleng ramdang tiang an rak kal i muihnak kha an rak ceuter, hnokcencunnak kha an rak fianter. Nihin Khrihfa hna cu mah pumpak hrimhrim rithai-sii tonghtham lonak menmen in ttuanvo ka tlinh tiah na ruat maw? Phe kah lo men in Pathian thluachuah naa ruahchan maw? Lamhlat ramleng ramdang cu chim lo, mah chuahkehnak vawlei kha upatnak in a hram santer ding zeitluk tiangin na tuah piak? Na nu le pa rualchan cingla, hawikom hna he pehtlaihin Pathian bia, nawlbia a pekmi ttuanvo hna kha zeitluk tiang na phawrh i na lim cang? tiin a nung liomi Khrihfa kan nunnak lamthluan kha zohfel tthan hna usih!