St. Charles Borromeo (1528-1584)
Audio (aw) zong in ngai khawh a si.👇👇
Siangbawi a cang hnga mi siangngakchia, Siangbawi cannak sianginn hna zohkhenhtu Mithiang Charles Borromeo cu Italy ram, Arona khua fate ah 1528 kum ah a chuak. Kum 22 a si ah a pu a simi Pope Pius IV nak nih Cardinal le Milan khua Bishop rian a rak khinh. Council of Trent ton-pumhnak kha a dih tiang a hruai hna hnu ah meeting biachahnak vialte kha tling tein a dih tiang ttuan dingin lam a rak hmuhsak hna. A uknak peng chung i Siangbawi uknak (Parish) chungah vakvaih in Pathian bia cawnpiak dingah nawl a rak chuah. Bupi ukmi Siangbawi cannak Sianginn a onh hmasabiktu a si. A holh-ka a aa i rianrang in a holh kho lo nain a phungchimnak cu hmual a ngei i a ttha ngaingai. Charles cu Bupi biaknak phunglam kha a upat tuk bantukin thlacamnak hna kha zeitik hmanh ah rianrang in a cam lo. Masa ka tuah lio ahhin ka thinlung a vaivuan a timi Siangbawi pakhat kha “Missa tuah dingin a rak chuah hlan, Angkifual i thlennak khaan ah zeidah na tuah tak? Zeitindah naa ttamh?” tiah bia a hal`han.
Bishop pa pakhat nih “Kei cu, zei rian hmanh ka ngei lo” a ti tikah Charles nih cu Bishop he pehtlai mi ttuanvo hna kha a ttialpiak hnu ah ttuanvo pakhat cio a donghnak ah, “Nang cu rianttuan awk ka ngei lo tiah na chim kho lai maw?” timi soiselnak zong a betchih. A ttuan mi rian poah ah ningcang tein a ttuan caah a ttuan mi hna cu sawhsawh si loin rianrang in a dih khawh. 1576-78 kum chung i a rak chuak mi Palik zawtnak tlun lioah a ngeih mi chawva thilri hna kha a zuar i mi sifak hna kha a bawmh hna. Asinain Charles i siamremh tthan nak hna cu hmun zakip ah an cohlan cio a si lo mei? Fapi in dohnak a ingmi upadi phungbia hna chungah Siangbawi vialte khahmul met a herhnak kong le aa tlak lomi Siangbawi hna cu tthawl awk an si timi zong aa tel.
Nikhat cu thlacamnak khaan ah thla a cam lioah zuarthlai Siangbawi pakhat nih meithal in a kah. Kuan cu a puan kha a khen ko nain a taksa zeihmanh tawng loin a puan cungah a tan kha khuaruahhar in an hmuh. St. Charles cu 1584, kum 46 a si ah Arona khua ah a thi.