November 4, 2025 Tuesday

Bible: Luke 14:15-24 📖📕

Puai Ngan Bianabia

Dawtmi ulenau hna, Min langhter lomi caṭialtu pakhat nih hi ruahnak dawh, Pathian nih, Ka sinah bia a chim, tiah a ṭial, Pathian nih a rawldanghnak ah a auhnak le a sawmnak kha kan lungthin kan pek taktak ahcun kan ruahṭhan awk a si.

Nihin thawngṭha caang ah, Jesuh nih hi sawmmi khual pawl kong a chim, annih cu lawmhnak an ngei lo i Pathian nih rawldanghnak ah sawmnak an cohlang lo. Thlarau lei caṭialtu tampi nih “nunnak rawl danghnak puai” tiah an auh, BC kumzabu pakhatnak ah Latin hlaphuah thiam le fimnak lei mifim Lucretius nih a sau i a minthangmi fimthiamnak hla De rerum natura ah “nunnak puai” kong a chimmi kha an zulh tiah zumh a si.

Siangpahrang i a puai nih Pathian pennak kong zeidah a kan chimh khawh? Siangpahrang asiloah bawi pakhat nih a rammi hna sinah sawmnak ca kha a hlankan in a kuat tawn hna, cucaah rawldanghnak ah rat awkah timhtuahnak caan tampi an ngei lai. Cun Bible ah vancung cu Pathian nih a pekmi nupi ṭhitnak puai nganpi tiah an ti tawn. Thawngpang ṭha cu puai vialte lakah a sunglawi bikmi puai ah sawm kan si. Asinain Jesuh nih, hi rawldanghnak bianabia ah, sawmmi khual pawl (kanmah zong a chim duhmi) nih a ruang an ser tikah ruahlopi in aa thleng. Puai tuah caan a phak tikah sawmmi hna nih siangpahrang i sawmnak an almi cu zeitluk indah nihsawhnak a si! Siangpahrang nawlnak kha biapi ah an chiah lo, zeicahtiah anmah duhnak kha amah duhnak nakin an chiah deuh.

Pathian nih nifatin a Eucharistic puai ah a kan sawm caah a nunnak a kan petu a Bia, a Taksa, Thisen le Thlarau in a kan cawm khawh. Asinain vanchiat ah, kan i tel lonak ding caah a ruang tampi asiloah a ruang chim in nalhnak (excuses) tampi kan ngei i cu hna nih cun cu bantuk zaangfahnak sawmnak cohlannak in a kan pialter khawh. Jesuh nih hi a ruang le a ruang nalh hna hi a chim: ahmasabik a ruang cu Pathian nih kan cungah a chimmi nakin abiapi deuhmi rian asiloah chawlehnak ruangah a si. Kan rianṭuannak nih a kan lak i Pathian ruahnak in a kan kham. Kan i khulrang zungzal. Missa pakhat nih caan pekmi a lonh tikah kan lung a tling lo.

A pahnihnak a ruang cu kan ngeihmi thil dang hna asiloah abiapi bikmi thil, Pathian pennak in kan lung a kan pialter duhmi thil dang hna kha kan sianh hna. Media hna: Facebook, Youtube, Tiktok le a dangdang asiloah a dang nuamhsaihnak hna nih thlacamnak le Pathian bia cawnnak caah kan caan a lak. TV le Phone zohnak ah suimilam tampi kan hman nain thla kan cam tikah kan i hngilh i kan tha a ba.

A pathumnak a ruang cu Pathian nakin kan inn le kan chungkhar kha biapi deuh ah kan chiah. Pathian nih zei a si zongah kan inn le kan i pehtlaihnak hi mah zawn lawng ruat in hman ding a si a ti ballo. Kan rianṭuannak, kan khua, kan innchungkhar ah Pathin kan sawm tikah le kan ngeihmi thilri midang kan hrawmh hna tikah A rian kan ṭuan ṭhabik hi a si.

Dawtmi ulenau hna, A donghnak ah, Pathian nih a inn kha khahter a duh timi, hi ahmaan biatak he khat hna u sih. Mithiang Paul nih hi kong hi a fehter i Khrihfabu Magisterium zong nih Pathian nih mi vialte khamh le biatak hngalh a duh hna ti kha a fehter lengmang ve, (1Tm 2:4). Cu bantuk cu, minung a sertu Pathian i ṭhatnak a si i amah hngalh, dawt le hi nunnak ah a rianṭuan ding le a ra laimi nunnak ah  amah hmaiah zungzal in nuamh khawhnak ding caah a si.