CATHOLIC BUPI CHUNGAH HMANMI ZIHMUI KONG

Zihmui cu Missa pi raithawinak canah Pathian le a mithiang hna hmaizah upat peknak ah hman a si. Cun kan thlacamnak kha Pathian sinah a kainak le kan ziaza a rim a thaw tiah langhternak a si.

(Rev. 8:3-5, Ps 141:1-3, Exo 30:1-10). Pope (12) nak St. Soter (AD. 166-175) nih Missa pi rawithawinak canah zihmui khanghnak kha a rak hman hmasa. Zihmui khut ning cu a tanglei bang in a si.

Zihmui khangh awkah tlangbawi nih zihmui dip kha umte chungah a paih. Tlangbawi nih zihmui kha vailamtah hmelchunhnak in thluachuah a pek i zihmui khangh hram a thawk. Khanghnak biakṭheng laksawng hna le vailamtung kha zihmui khangh thawi mi a khu in a zelhter.

Cu biakṭheng hmai i orhlei kamin kehlei kam ah khan tlangbawi cu akal i zihmui a khu kha a zelhter hna. Thawi mi laksawng hna kha zihmui khanghnak ah tlangbawi nih vailamtahnak hmelchunhnak in thluachuah a pek hnu ah zihmui veithum a khut hna.

Thawinak biakṭheng le laksawng hna hmai ah zihmui khut hlan lukun a herh lo. Vailamtung kha zihmui khu in a zelhter hlan ah a lu a khun hnu in voithum tiang zihmui khu in a vel ter. Thawimi laksawng hna kha zihmui khutter lio ah biakṭheng cungah Microphone hna le Missa raithawinak cauk (Roman Missal) hna kha chiah lo awk a si.

Tlangbawi nih thawinak biakṭheng laksawng hna le vailamtung kha zihmui a khut hnu ah Deacon (or) a bawmtu nih tlangbawi sin in zihmui kha a lak lai i tlangbawi hna hmai ah lukun in voihnih cio hlorh in voithum tiang (laifang, kehlei, orhlei) ti in voi (6), cu bangin zumtu Khrihfa aa pum mi hna sinah khan aa mei lai i lukin hnu ah (laifang, kehlei, orhlei) ti in voi (2) cio hlorh in voi (3) tiang zihmui kha a khut hna lai. Tlangbawi tu cu amah kha zihmui an khut hnu ahcun biakṭheng pawngah a dir lai i a kut aa ṭawl lai.