October 30, 2025

Thursday – Audio 🎧👇

Luke 13:31-35

Herod nih Jesuh thah a duhnak

Farasi cheukhat nih, nihin thawngṭha ah, Jesuh cu Siangpahrang Herod i thinhunnak le rawhralnak in zam dingin ralrinnak an pek. Asinain Amah nih cun, cu nakin, thlarau lei rawhralnak kong le zeitindah hrial khawh a si timi kong ralrinnak a pek hna. Jesuh nih Herod cu “cinghngia” tiah a ti tiangin a kal. Zeicatiah cinghngia cu saram vialte lakah a fimbik le a hrawk kho bik tiah ruah a si caah a si. Cianghngia cu man ngeilo le santlai lo pumpak pakhat hmelchunhnak zong a si.

Jesuh nih thlarau rawhralnak kong le zeitindah hrial khawh a si timi kong a chim caah, thlarau teinak le khamhnak caah kan i zuamnak ah a kan bawm khomi phunglam cheukhat, mi pakhat nih a chimmi hna kha a tawinak in kan langhter lai.

Pakhatnak ah, kan ral kha hngalh hna u sih. Kan chunglei ah kan i kenmi kan ral ṭihnungbik cheukhat hna cu kanmah i thathutnak, nuamh loding ṭihphannak, porhlawtnak, midang nih kan cung i an ruahmi cungah ahleiin hngalhthiamnak le a dangdang hna an si. Asinain Satan cu kan ral nganbik a si caah, “a khuakhannak kha kan hngal lo awk a silo,” tiah Mithiang Paul nih ruahnak a kan cheuh i a sining kha ṭha tein hngalh i a cawlcangmi le a hrawhmi rian kha zeitikhmanh ah zei rel loin um hlah. Tukforhnak doh awkah i ralring law thlacam ding le “Miṭhalo Pa sinin kan khamh” tiah Pathian sinah thlacam dingin Jesuh nih ruahnak a kan cheuh.

Pahnihnak ah, Pathian dawtnak chungah umpeng ko hna usih. Satan ṭhawnnak kha kan ṭih awk a si lo zeicahtiah Khrih ceunak chungah kan kal i a dawtnak chungah kan umpeng ahcun zeihmanh ṭih awk kan ngei lo. Tling tein le zungzal in kan him. Miṭhalopa nih a kan tawng lai lo.

Pathumnak ah Thiang Thlarau in khah hna usih. Porhlawtnak nih kan ruahnak kha fawi tein a uk. Khrihfa dang hna i sualnak nih kan khuaruah a harter ko nain kanmah derthawmnak kha kan mit a caw. Cucaah thil ṭhalo paohpaoh doh awkah kanmah le kanmah i timhtuah awk le Miṭhalo Pa tei awkah Thiang Thlarau cungah i hngatchan awkah amah i laksawng kan herh.

Palinak ah, Khrihfa tehte khannak le rianṭuannak ah cawlcang hna u sih. Mithiang Jude nih a cakuat ah lunghrinhnak a ngeimi hna zumhter awkah Khrihfa hna kha a forh hna. Phundang in kan chim ahcun nifatin tein Bawipa duhnak hngalh le tuah a herh. Isaac Watts nih “Satan nih thil ṭhalo cheukhat kha rianṭuan lomi kut nih tuah awk ah a hmuh rih” tiah a chimmi cu ahmaan i mah cu Carl Jung nih “Ranh…cu, Khuachia a si” timi bia he aa tlukmi a si. Jesuh nih Thawngṭha cauk chung i hi tlukruannak hi a kilven, thazaang der tiang rian a ṭuan nain a thlarau ah a dai, a rian a tam nain a ran lo i ralring tein a um caah a lungre a thei lo.

Panganak ah, a palhmi pehtlaihnak kha remh colh hna u sih. Mi fahnak pek le kanmah fahnak tuar cu hrial khawh a si lo. Cucaah Jesuh nih voi sarih lawng si loin voi sawm sarih voi sarih ngaihthiam a herhnak kong a kan cawnpiaknak cu a si. Zeicatiah, tahchunhnak ah kan thinhunnak bantukin, ni a tlak cang ko zongah kan thinhunnak kha kan pehzulhter ahcun, kan i hngilh kho lo; a thaizing ah lungdonghnak le thinhunnak; cun khuachia kha kan thinhunnak hman khawhnak caanṭha a pek lai. Cucaah khulrang in remh hna u sih.

Paruknak ah, thlacamnak ah zungzal in um hna u sih. Thlarau in Jesuh Khrih thawngin zeitik caan paoh ah Pathian sinah thlacam hna u sih. Amah sinah kan ra lai, Amah kha kan hngah lai, Amah chungah kan thazaang kan tharchuah lai, Amah bia kan ngaih lai, Amah kha kan i bochan lai i cu hnuah raldoh awkah vawlei ah kan chuak lai. Jesuh nih amah i rianṭuannak caah thlacam a herh zungzal ti kha a hngalh ahcun, toidornak le teimaknak he thlacamnak in kan derthawmnak kha zeitluk in dah kan cohlan awk a si?

Jesuh nih a hremtu hna le Pathian nih a thlahmi profet hna a hlawmi hna caah thlacamnak kong a fekmi tahchunhnak a kan pek. Nihin ah kan ral hna le thawngṭha a dohtu hna caah thla kan cam maw? Dawtmi ulenau hna.